28 ‘o Siulai, 2018 Kuo a’u ‘eni ki he ta’u hokohoko ‘e tolu ‘a e kau mai ‘a e Va’a Siolokí. ‘a ia ‘oku fakamalumalu ‘i he Potungāue Fonua, Savea mo e Ngaahi Koloa Fakaenatulá, ki he Maa’imoa Faka’ali’ali Ngoue 2018.
‘I he fakamatala ‘a e ‘Ofisa Sioloki, ‘Apai Moala, ko e taha ‘eni ha faingamālie lelei ke ‘ata ki tu’a ‘i he tafa’aki kehekehe ‘a e ngāue ‘oku fakahoko ‘e he Va’a Siolokí, pe ko e ngāue fakasiolokí.
“’Oku mau ongo’i fiefia ‘aupito ‘i he ‘emau kau maí, tautefito ‘a e ‘uhingá, ke ‘ata ki tu’a ‘a ‘emau ngāue, he ko e ngāue fakasiolokí ‘oku mahino ‘a e mafatukituki ‘a hono ngaahi fatongiá. ‘Oku mau ‘i heni ai ke fakakakato ‘a e ngaahi tafa’aki ko iá, he ko e siolokí ma’aˊe fonuá mo e koloa ‘a e fonuá.”
‘I he Va’a Siolokí ‘oku ‘i loto ‘a e va’a ki he matātahí pe matafonuá (coastal), ‘i ai ‘a e va’a ki he maka koloa tahi loloto (deep sea mineral), pea ‘oku ‘i ai foki mo e tafa’aki hono tokanga’i ‘o e vaí (water management).
“Hangē ko e keli maka koloa mei he tahi lolotό, ‘oku lahi ‘aupito ‘a e ngaahi tekinolosia ‘oku ngāue’aki pea ko hono ‘oatu koē he ngaahi tohi tufá e ‘ilo leva kakai, ‘e lava leva ke mahino lahi ange ki he tafa’aki ko ia ki he kakaí.”
Na’e fakahā foki ‘e Moala ‘oku fiefia ‘a e va’á he ‘oku nau fakafofonga’i kotoa mai ai pē ‘a e Potungāue Fonuá, Saveá mo e Ngaahi Koloa Fakaenatula.
NGATA’ANGA
Tuku atu mei he: Potungāue Fakamatala ‘Ea, Ma’u’anga Ivi, Ma’u’anga Fakamatala, Tokangaekina ‘o e Fakatamaki Fakaenatula, ‘Atakai, Feliuliuaki ‘o e ‘Ea mo e Fetu’utaki