05 ‘o ‘Epeleli, 2022 Na’e foaki ki he ‘Eiki Palēmia, Hon. Hu’akavameiliku ha palau ‘e tolu mei he fakafofonga ‘o e tangata pisinisi Nu’usila ‘i he houa pongipongi ‘o e ’aho ni, ‘i Matatoa, Tofoa.
Na’e loto ‘a e tangata pisinisi Nu’usila ko eni ke ne tokoni’i ‘a Tonga ni hili ‘a e mapuna ‘a e mo’ungaafi Hunga-Tonga-Hunga-Ha’apai mo e hake ‘a e peau kula ‘i Sanuali 15.
Na’e me’a ‘a e ‘Eiki Palēmia ‘o fakamalo’ia’i mo fakahā ‘a e hounga’ia ‘a e Pule’anga ‘i he tokoni ko eni kuo a’utaki mai.
“’E tokoni lahi eni ki he ngoue ‘a e tukuikolo ‘i he feinga ke fakaakeake mo foki ‘a e fonua ki he angamaheni hili ‘a e fakatamaki,” ko e me’a ia ‘a Hon. Hu’akavameiliku.
Na’e me’a ‘i he polokalama ni mo e Tokoni Palēmia ke tali ‘a e tokoni ko eni. Na’e ‘i ai mo Salote Sisifa, ko e fakafofonga ‘o e tangata pisinisi Nu’usila ‘i Tonga ni, fakataha mo e kau fakafofonga mei he tukuikolo ‘e foaki ki ai ‘a e tokoni.
NGATA’ANGA
Tuku atu mei he: ‘Ofisi ‘o e Palēmia, Pule’anga Tonga, Nuku’alofa, Tonga. Tu’asila: Taufa’ahau Road, P.O. Box 62. Tel: (676) 7401351 Fax: (676) 23 888; Ngaahi Faka’eke’eke- Email: pressroom@pmo.gov.to Uepisaiti: www.pmo.gov.to