28 ‘o Fepueli, 2020 Na’e huufi ‘e he Fakaafe Fakalangilangi ka koe Fakafofonga ‘o e Ma’u tofi’a ‘o Vainí Tevita ‘Ungá ‘i he ho’ata ‘aneafi ‘a e Langa fo’ou ‘o e loki ako ‘e 10 ‘a e Ako Pule’anga Vainí ne uesia ‘e he Saikolone Kita ‘i Fepueli 2018.
Ko e loki ako ‘e 10 ne langa fo’oú ‘i he faleako lalahi ‘e 4 ‘a ia ‘oku fe’unga e lahi ‘o e loki ako takitaha mo e mita ‘e 7.2 ‘a hono loloá pea mita ‘e 7 ‘a hono maukupú mo e ngaahi loki tuku’anga naunau (storage). Na’e fakapa’anga ‘a e langa fo’oú ni ‘e he Polokalama Ngäue Langa ke Matu’uaki mei he Ngaahi Fakatu’utamaki ‘i he Pasifiki ‘a e Pangikë ‘a Mamaní mo e Pule’anga ‘Aositeleliá ‘o fe’unga mo e $1.7 miliona.
‘I hono fakamatala ‘o e ngäue kuo lava ‘e he Pule Lahi ‘o e Potungäue MEIDECC, Paula Pouvalu Ma’u na’a né pehë ko e langa lahi taha eni mo pa’anga lahi taha he ngaahi langa ‘apiako kotoa ‘e tolungofulu mei he Matangi ko Kitá ‘i he polokalama koeni.
“Na’e fakahoko e langá he kautaha Kiwi Tonga ‘i he mahina pé eni ‘e fa, ‘o fakatatau pé ki he palani na’e tä ‘e he Kautaha ‘Aositelelia ko e Cardno pea tokanga’i pé e langa he Potungäue ki he Ngaahi Langa Lalahi pé MOI”.
Na’a né pehë ko e langa ko ení ke toe lelei angé mo malohi angé ke ne matu’uekina ‘a e ngaahi fakatamaki fakaenatula malohi, mo malu ange ki he’etau fanau mo e kau faiako.
“Pea ‘e toe hoko pe foki ko e Fale Hufanga malu ki Vainí mo e ngaahi kolo kaunga’apí, ka ko e me’a mahu’inga tahá ke ‘aonga mo ola ki he teu tangata ‘oku tau fakahokó mo poupou ki he Lotu mo e Ako ‘i he fonuá ni.”
Na’e fakamalö’ia ‘e he Tokoni Pule Lahi ki he Ngaahi Lautohi Pule’angá, Seilosehina Fifita ‘a e Pangikë ‘a Mamaní mo e Pule’anga ‘Aositeleliá ‘i hono fakapa’anga e langá ni pehé ki he ngaahi Potungäue kehekehe pë ‘a e Pule’angá ‘i he ngaahi fengäue’aki kotoa pë ke hoko ai ‘a e polokalama ‘o e ‘ahó ni.
Na’e kau mai ki he polokalama huufí ‘a e Minisitä ki he Potungäue Akó mo e Ako Ngäué, Hon. Siaosi Sovalení, Fakafofonga mei he Pangikë ‘a Mamaní, Fakafofonga mei he Pule’anga ‘Aositeleliá, Faifekau Pule ‘o e Siasi Uesiliana ‘o Vainí, kau ‘ofisa ‘a e pule’angá mo e kau fakaafe makehe.
NGATA’ANGA
Tuku atu mei he: Potungāue Fakamatala ‘Ea, Mau’anga Ivi, Ma’u’anga Fakamatala, Tokangaekina Fakatamaki Fakaenatula, ‘Atakai, Feliuliuaki ‘o e ‘Ea mo e Fetu’utaki