27 Novema, 2019 Ko e fanongonongo eni ke mea’i ‘e he kakai ‘o e fonua fekau’aki pea mo e ta’ofi ‘a e fefolau’aki po’uli ki he mala’e vakapuna Lupepau’u ki Vava’u koe’uhi ko e ma’olunga ‘o e ‘ulu ‘akau mo e ngaahi fakafe’atungia ‘oku tu’u ‘i he ongo faha’i to‘angavaka ‘o e hala to’anga vakapuna (runway).
Kuo fakapapau’i kuo kakato ‘a e ngaue ki hono ta ‘o e ‘ulu ‘akau mo e ngaahi fakafe’atungia ko eni. Ko e fanongonongo ni ke fakapapau’i atu ko e ‘ulu ‘akau mo e ngaahi fakafe’atungia ki he
ongo faha’i to’angavaka loua (‘elia ki Leimatu’a mo e ‘elia ki Holonga) ‘o e ongo halanga to’anga vakapuna ‘i Vava’u kuo ‘osi ta ‘o tukuhifo.
Koia ai, kuo malava ke fakahoko e fefolau’aki po’uli ‘a e kautaha vakapuna (Real Tonga) ki Vava’u pea mo e foki mai ‘i he taimi ni. Fakamalo atu mei he Va’a Fefolau’aki Vakapuna Sivile ‘o e Potungaue Ngaahi Ngaue Lalahi ki he kainga ‘o Leimatu’a pea mo Holonga he’enau fengaue’aki fakataha mo e poupou na’amou fakahoko ‘o lava lelei ai ‘a e ngaue ki he poloseki koeni ‘o a’u ki he’ene ‘osi.‘Ikai ngalo ke fakamalo’ia e tokoni lahi ‘a e Pule Fakavahe Vahenga Leimatu’a pea mo e ongo Ofisa Kolo ‘o Leimatu’a mo Holonga pea mo e Ofisa faifatongia he ‘ofisi Vava’u 16 ki ho’omou tokoni kotoa pe.Tatau moia, fakamalo foki ki he Kautaha Mala’e Vakapuna ‘o Tonga (Tonga Airports Limited) ki he tokoni ‘a hono fakahoko ‘o e fatongia ta ‘akau na’e fakahoko.
Ki hono fakaikiiki, kataki fetu’utaki mai kia John Wycliffe Havea ki he Potungaue Ngaahi Ngaue Lalahi ki he fika telefoni 28-024 pe ko e ‘imeili: kilifihavea@gmail.com
Faka’apa’apa atu,
Hon. ‘Akosita Havili Lavulavu
Minisita ma’ae Ngaahi Ngaue Lalahi mo e Takimamata
Fanga ‘o Pilolevu