22 ‘o Sune, 2019 ‘Oku fakafuofua ko e ta’u hokohoko eni ‘e fā ‘a e kau atu ‘a e ‘Ōfisi ‘Omipatimeni ‘a Tongá ki he Polokalama Maa’imoa Faka’ali’ali Ngoué, Toutaí, Takimamatá pea mo e Fefakatau’aki ‘a e Vahe Fonua Tongatapú.
Na’e fakahā ‘e he ‘Ōfisa Fetu’utaki ‘a e ‘ōfisí Nanisē Fifita ko e ngaahi naunau ne nau faka’ali’alí ‘oku tokoni ia ki he ngāue ‘oku nau fakahoko ‘i hono faka fehokotaki ‘aki ki he kakai ‘o e fonuá ke nau mahino ‘a e ngaahi tefito’i fātongia ko ia ‘a e ‘ōfisí.
Ko e ngaahi naunau ne faka’ali’alí ne kau ki ai ‘a e peni, kato, falani, fakamalu, ipu pea mo e ngaahi naunau kehe pē.
“Ko e ‘ōfisí ‘oku ne tali pe ha taha ‘oku ‘ikai fiemālie ki ha fa’ahinga fakahoko fatongia ‘a e ngaahi Potungāue ‘a e Pule’angá pē pisinisi ‘a e Pule’angá.
Na’aˊne pehe ‘oku nau ongo’i lavame’a ‘i he‘enau kau ki he polokalamá “koe’uhi ko e kau mai e kakai ke ‘oatu ‘emau fanga ki’i tohi fakahinohino ke nau fetu’utaki mai ai ki he’emau telefoni ta’etotongi mo e ngaahi founga kehekehe pē ‘o tatau pe ki Tonga ni mo muli foki.”
Na’aˊ ne fakahā koe lava pe ‘a Tonga ni tenau hoko atu leva ki he faka’ali’ali ngoue ‘a Ha’apaí, Vava’u, Ongo Niuá mo ‘Eua he ko e fāingamalie ‘eni ‘e lahi ange ai e mahino mo ‘ilo ‘e he kakai ‘o e fonuá ‘a e tefito’i fatongia ‘a e ‘ōfisí.
NGATA’ANGA
Tuku atu mei he: Potungāue Fakamatala ‘Ea, Mau’anga Ivi, Ma’u’anga Fakamatala, Tokangaekina Fakatamaki Fakaenatula, ‘Atakai, Feliuliuaki ‘o e ‘Ea mo e Fetu’utaki