22 Sune 2019 Na’e faka’ali’ali ‘e he Va’a Fefononga’aki ‘i he Hala Pule’angá ‘a ia ‘oku fakamalumalu ‘i he Potungāue ki he Ngaahi Ngāue Lalahí ‘a e taha ‘o e ngaahi naunau fo’ou ‘oku ‘amanaki ke fokotu’u ke tokoni ki he kolosi ‘i he hala pule’angá ‘i he pongipongi ‘o e ‘aho ni he Polokalama Faka’ali’ali Ngoué, Toutaí, Takimamatá pea mo e Fefakatau’aki ‘a e Vahe Fonua Tongatapú 2019, Mala’e Funga Manamo’uí.
Fakatatau ki he fakamatala ‘a e Talēkita ‘o e Va’a Fefononga’aki Hala Pule’angá Tevita Lavemai, ‘e pailate’i ‘a e naunau fo’ou ko ‘ení ‘i he kolosi’anga ‘oku tu’u ‘i he ‘Apiako Lautohi Nuku’alofá ‘i he mahina kaha’ú.
Ko e naunau fo’ou ko ‘eni ‘oku hangē pē ko e natula ‘o ha fu’u pou ‘a ia ‘e omi pē ‘a e fānaú ‘o lomi’i pea ‘e ulo ulo leva ‘a e fanga ki’i maama ia he fu’u pou ko ‘eni ki he ngaahi me’alelé. Ko e fanga ki’i maama ko ‘ení tene ‘oange ‘a e fakatokanga kimu’a ki he kau faka’uli ‘oku ‘i ai a e tokotaha ‘oku ‘amanaki ke kolosi.
‘I he fakamatala ‘a Lavemaí ko e taumu’a pe ia ‘a e Potungāué ke malu e fefononga’aki pea ‘e tokoni lahi ‘a e me’a ngāue ko ‘ení ki he fekolosi’aki ‘i he hala pule’angá.
‘I he hili ‘a hono pailate’i ‘a e naunau ko ‘ení pea ‘e toki fai ‘a e sio ki hono fokotu’u ‘o a’u ki he ngaahi kolo kehé. ‘Oku fakalele pe ‘a e ki’i naunau ko ‘ení ‘e he solá ‘o ngāue’aki ‘a e ivi mei he la’ā.
Fakatatau kia Lavemai ko e naunau ko ‘eni ko e tokoni ia ‘a e poloseki ‘a e tokotaha Tonga nofo ‘i Florida (USA) ko Māsila Masani.
Na’e faka’ali’ali foki mo e ngaahi naunau kehe pē ‘o hangē ko e ngaahi faka’ilonga ‘oku tu’u ‘i he hala pule’angá ke fakamanatu pē ki he kakai ‘o e fonuá ‘a e taumu’a mo e ‘uhinga totonu ‘a e tu’u ‘a e ngaahi faka’ilonga ko ‘ení.
Na’á ne to e fakahā foki ‘oku ‘i ai ‘a e fakakaukau ke nau muimui fononga holo ‘i he maa’imoa faka’ali’ali ngoue ‘a ‘Ene ‘Afió ki he ngaahi ‘otu motu ke faka’ali’ali ai ‘a ‘enau ngaahi naunaú.
Ko e ta’u ‘aki ‘eni ‘e tolu ‘a e kau atu ‘a e Va’a Fefononga’aki Hala Pule’anga ki he Maa’imoa Faka’ali’ali Ngoué.
NGATA’ANGA
Tuku atu mei he Potungāue Fakamatala ‘Ea, Ma’u’anga Ivi, Mau’anga Fakamatala, Tokangaekina Fakatamaki Fakaenatula, ‘Atakai, Feliuliuaki ‘o e ‘Ea mo e Fetu’utaki.