24 ‘o Me, 2019 ENGLISH ‘I he fengaue’aki vaofi mo e NIWA (National Institute of Water and Atmospheric Research Limited) ‘o Nu’usila, na’e foaki atu ai ‘e he Va’a Malini mo e ngaahi Taulanga ‘a e Potungaue ‘a e ngaahi sitifikeiti mo e silapa ako ke ngaue’aki ‘e he ako na’e fakahoko ‘e he Potungaue Toutai ‘a Tonga.
Na’e fe’unga mo e TOP$50,000 ‘a e ako ni ki he kau toutai mo e kinautolu ‘oku ‘i ai honau vaka mo ngaue ki tahi. Ne foaki atu ‘a e sitifikeiti ki he malu ‘a e folautahi pea mo e sitifikeiti ki he ‘Enisinia Malini Kalasi 6 na’e fakahoko fakataha mo e Kosilio ‘a e kau toutai.
Na’e fakapa’anga kakato ‘e he pule’anga Nu’usila ‘a e ako ni, ‘a ia na’e fakafofonga’i mai ‘e he Tokoni Komisiona Le’ole’o a Nu’usila ki Tonga, Okesene Moanonu.
Na’e kau atu he ako ni ‘a hono tokangaekina ‘o e malu he folau tahi mo e ngaahi tokoni ‘o ka hoko ha vela, ‘uluaki tokoni pea mo e ako ki he’ete malu fakafo’ituitui mo e ngaahi fatongia fakasosiale. Ne kau mai ki he ako ni ‘a e kau ma’u vaka tokolahi, kau toutai fakalotofonua mo e ngaahi kupu fekau’aki hange ko e Va’a ki he fakahaofi mo’ui ‘a e Potungaue Polisi Tonga.
Ne foaki atu ‘a e ongo sitifikeiti ki he Malu ‘o e folau tahi mo e Enisinia Malini Kalasi 6 pea faka’osi ‘aki hono foaki ‘o e ngaahi kato kuo ‘osi fakanaunau kakato ki he malu ‘a e kau fefolau’aki vaka tahi. Ne fakafofonga’i atu ‘e he Talekita ‘o e Va’a Malini mo e ngaahi Taulanga, Kelela Tonga, ‘a e Potungaue pea faka’osi ‘aki e polokalama ni ‘a e lea fakamalo mei he Pule Poloseki NIWA, Dr. Steve Parker.
Ngata’anga
Ongoongo tuku atu : Potungaue e Ngaahi Ngaue Lalahi