25 Ma’asi 2019 Na’e foaki atu ‘e he Kautaha Siapani ko e Trust Corporation Co. Ltd ha maama sola ma’a e ‘Apiako Ocean of Lights pea mo e Acts Community School ‘i he pongipongi ‘o e ‘ahó ni ‘i ha polokalama makehe ‘a ia na’e fakahoko ‘i he ‘Apiako Ocean of Lights.
Na’e tataki ‘a e polokalama ko ‘eni ‘e he Va’a Ma’u’anga Ivi ‘a ia ‘oku fakamalumalu ‘i he Potungāue MEIDECC.
Ko e ngaahi maama sola (solar powered lights) fakakātoa ‘e 20 ‘a ia ‘oku taki 10 ai ‘a e ongo ‘apiako ko ‘eni. Taimi tatau pē na’e to e foaki atu foki ‘e he Sea ‘o e Kuataha Masakazu Hatanaka mo ha fanga ki’i maama sola ‘e 120 ma’ae Va’a Mau’anga Ivi.
‘Oku fakataumu’a ‘a e maama sola kuo foaki ma’ae ongo ‘apiako ke tokoni ki hono fakamaama ‘o e ‘apiako ‘i he taimi po’uli tupu mei he lahi ‘o e mole ‘a e ngaahi naunau ‘i ‘apiako ‘i he kuohili.
Ko e ngaahi maama leva ‘e 120 kuo foaki ma’ae Potungāue MEIDECC, ke tufaki ia mo fokotu’u ‘i he ngaahi feitu’u pe kolo oku ‘ikai ke a’u kiai ‘a e laine ‘uhila.
Ko hono lelei ‘o e ngaahi maama sola ma’ae ongo ‘apiako ‘e fakasi’isi’i ai ‘a hono ngaue’aki ‘a e ‘uhila ‘i he po’uli. Ko e kongokonga talifaki ‘o e ngaahi maama kuo foaki ‘oku ‘omai hangatonu pe ia mei he Kautaha Trust Corporation Co. Ltd.
NGATA’ANGA