03 ‘Okatopa 2018 ‘Oku kamata ‘i he ‘ahó ni, ‘aho Pulelulu, 3 ‘Okatopa ‘a e Sivi Hū Ki he Ngaahi Kolisí ‘a e fānau ako kalasi onó ‘o toki faka’osi ki he ‘aho Tu’apulelulu 4 ‘Okatopá.
‘Oku fe’unga mo e fānau ako ‘e toko tolu afe teau hongofulu ma fitu (3,117) fakakātoa ‘oku ‘amanaki ke nau kau ‘i he Sivi Hū ‘o e ta’ú ni, ‘o fakafehoanaki ki he toko uaafe hivangeau hivangofulu (2,990) na’a nau sivi ‘i he ta’u kuo ‘osí.
Fakatatau ki he fakamatala ‘a e Tokoni Pule Sivi mei he Va’a Sivi ‘a e Potungāue Akó, Losana Vao Latu, ‘e kamata’aki ‘a e sivi hū ‘a e Lēsoni Lea Fakapilitāniá (English) ‘i he pongipongi pea ko e Lēsoni Saienisí (science) ‘i he houa efiafí.
‘E faka’osi’aki leva ‘a e siví ‘a e Lēsoni Fiká (math) ‘i he pongipongi Tu’apulelulú, pea Lēsoni Tala ‘o Tongá ‘i he houa efiafi.
Na’á ne pehē ko e fai’anga sivi fakakātoa ‘e teau hongofulu ma ua (112) ‘e fakahoko ai ‘a e sivi ‘a ia ko e fai’anga sivi ‘e nimangofulu ma ono ‘i Tongatapú ni, uofulu ‘i Ha’apai, tolungofulu ma taha ‘i Vava’u, tolu ‘i ‘Eua pea takitaha leva ‘a e Ongo Niuá.
‘I he ‘ene fakamatalá na’e ‘i ai ‘a e fai’anga sivi fo’ou ‘e fa na’e toki fokotu’u ‘i he ta’ú ni ‘a ia ko e fai ’anga sivi ‘e tolu ‘i Tongatapú ni pea taha leva ‘i Vava’u.
Hili ‘a e sivi hū ‘e fakafuofua ke ma’u ‘a e olá ‘i Nōvema ‘o e ta’u ni.
NGATA’ANGA
Tuku atu mei he Potungāue Fakamatala ‘Ea, Ma’u’anga Ivi, Ma’u’anga Fakamatala, Tokangaekina Fakatamaki Fakaenatula,’Atakai, Feliuliuaki ‘o e ‘Ea mo e Fetu’utaki