18 ‘o Me, 2016 Na’e fakamo’oni ‘a e Pule’anga Tongá ‘i ha aleapau mo e Kolo ko Dongguan ‘i he feitu’u ko Guangdong ‘i Siaina, ‘i he efiafi Mōnite, 16, ‘i he fale fakataha’anga ‘o Fa’onelua.
‘Oku fakataumu’a ‘a e aleapau ko ‘ení ke to e fakalakalaka ki mu’a ‘a e vā fengaue’aki, faka’ai’ai ha hoa ngāue ‘oku tu’uloa pea mo e fakalakalaka ki mu’a ‘a e ngāue fakatahá mo e fevahevahe’aki.
Taimi tatau na’e toe fakamo’oni mo e Kōvana Ha’apaí, Hon. Mo’ale Finau ‘i ha aleapau mo e Tokoni Pule Kolo ‘o Dongguan, Mr. Yang Xiaotang ke langa hake ha vā fengāue’aki fakatokoua ma’a Ha’apai mo Dongguan.
Na’e fakahā ai ‘e he Palēmia Le’ole’ó ka ko e Minisitā ‘a e MEIDECC, Hon. Siaosi Sovaleni ‘oku hoko ‘a e aleapau ko ‘ení ke ne toe fakamalohia ‘a e vā fengaue’aki ‘i he vaha’a ‘o Tonga mo Dongguan.
“’Oku toe fakamalohia ange ‘a e vā koia ‘o e Kolo ko Dongguan pea mo e Pule’anga ‘o ‘Ene ‘Afió, ‘i he aleapau ko ‘eni kuo fakamo’oní, ki ha fengaue’aki fakataha ‘i he kaha’ú, pea mo ha aleapau ki ha vā fengaue’aki fakatokoua ‘i he vaha’a ‘o Dongguan mo e Motu ko Ha’apai.”
“’Oku tau falala ‘e hoko ‘a e vā fengaue’aki ko ‘eni ke ne to e teke ki mu’a ‘a e fengau’aki lelei kuo fakahoko pea mo ha vā ‘oku tu’uloa ‘i he vaha’a ‘o Siaina pea mo e Pule’anga Tongá.”
‘I he ‘osi ‘a e ouau fakamo’oni aleapaú na’e foaki atu leva ‘e Mr. Yang Xiaotang ki he Pule’anga Tongá ha ngaahi me’a ngāue ki he Ngoué, Ako pea mo e Potungāue Mo’uí.
NGATA’ANGA
Tuku atu mei he Potungäue Fakamatala ‘Ea, Ma’u’anga Ivi, Ma’u’anga Fakamatala, Fakatamaki Fakaenatula, ‘Atakai, Feliuliuaki ‘o e ‘Eá mo e Fetu’utakí