18 ‘o Me, 2016 Na’e foaki ‘e he kau timi ‘a’ahi mai mei Siaina mei he kolo ko Dongguan ‘i he vahefonua Guangdong ha me’a’ofa ki he ‘Apiako Ma’olunga ‘o Tongá ‘i he ‘aho Mönite ‘o e uike ni.
Ko e me’a’ofa ko ení ‘oku kau ai ‘a e komipiuta to’oto’o ‘e 12, ngaahi kato naunau lahi hake he 1,000, ngaahi naunau ako mo e sipoti pea mo e ngaahi komipiuta ‘e 30.
‘I he me’a ‘a e fakaafe fakalangilangí, ‘Eiki Palemia Le’ole’o ka ko e Minisitā ‘a e MEIDECC Hon Siaosi Sovaleni ‘i he ouau foaki tokoni mei Dongguan, na’a ne pehe ai ko e ngaahi naunau fakatekinolosia ‘o e fetu’utakí ‘e tokoni ia ki hono faka’atä e ngaahi sëvesí ‘i he ngaahi tapa kotoa pë ke lava ‘a e kakaí ‘o ngäue’aki.
“Ko e ngaahi naunau fakatekinolosia ‘o e fetu’utakí ko e kï tefito ia ‘o e fakalakalaka tu’uloá pea ‘oku totonu ke ‘atä ia ki he taha kotoa. ‘Oku malava ke ne faka’atä ‘a e sëvesi ‘i he mala’e ‘o e ‘akó pea mo e mo’uí ke ‘inasi ai ‘a e taha kotoa. ‘Oku ne lava foki ‘o faka’ata ‘a e fakahoko fatongia ‘a e pule’angá ke toe lelei ange ‘i he totongi ma’ama’a ‘ikai ke ngata pë aí ka ‘oku ne toe fakapapau’i foki ‘oku ‘i he tu’unga fakafiemalie ‘a e ngaahi tokoni ki he ngaahi fakatamaki fakaenatulá pea mo e tokateu ki ha fakatamaki ‘e hoko.”
Na’e me’a foki ‘a e ‘Eiki Palëmia Le’ole’ó ‘i he mahu’inga ke langa hake ‘a e ngaahi ‘ilo ki he ngaahi tekinolosia ‘o e fetu’utakí ‘i hano ako’i ‘a e kau ngäué ke nau ‘ilo ki he ngaahi tekinolosia ko ení pea pëhë foki ki he fänau akó ke nau ako fekau’aki mo e mala’e ko ení.
“Ko e ngaahi tokoni komipiuta ko ení ‘e tokoni lahi ia ki hono a’usia ‘a e ngaahi ta’umu’a ko ení. ‘E tokoni lahi ia ki he fänau akó ‘i hono teuteu’i kinautolu ki he ngaahi ako mä’olunga angé ke nau ‘ilo e anga hono ngäue’aki ‘o e komipiutá.”
Na’a ne fakamälö’ia foki ‘a e Tokoni Pule Kolo ‘o Dongguan mo e me’a’ofa kuo ne foaki mo ‘ene timi ‘a’ahi mai ki Tongá ni pea ne fakahä ‘ene faka’amu ko e kamata eni ‘a e vä fetokoni’aki ‘o e ‘Api ako Ma’olunga ‘o Tongá mo e kolo ‘o Dongguan.
‘I he lea ‘a e Talëkita Seniale ‘o e Akó ‘i he Vahefonua Guangdong Ms Liang Fengming na’a ne pëhë ai kuo ‘osi mätä tonu ‘e he ‘Api ako Ma’olunga ‘o Tongá ‘a e vä fengaue’aki ofi ‘a Siaina mo Tongá.
“Kuo ‘osi mätä tonu ‘a e Ako Ma’olunga ‘o Tongá ‘a e vä fengäue’aki ‘a e kakai ‘o Siainá mo Tonga ‘i hono langa ko ia ‘a e ‘api akó ‘i he tokoni mei he Pule’anga Siainá ‘i he ta’u ‘e 11 kuohilí.”
“‘Oku ou fiefia ‘i he ‘aho ni ke ‘omai ‘a e tokoni ko ení ke toe leleiange ai ‘a e tu’unga fakaako ‘a e ‘api ako ni pea mo toe fakafo’ou ‘a e va fengau’aki ‘o Siaina mo Tongá.”
Ne fakataumu’a foki ‘a e folau mai ‘a e timí ke faka’ai’ai ‘a e vä fengaue’aki ‘a Tonga mo Dongguan pea mo langa ha vä fakatokoua mo e ‘Otu Motu Ha’apaí.
NGATA’ANGA
Tuku atu mei he Potungäue Fakamatala ‘Ea, Ma’u’anga Ivi, Ma’u’anga Fakamatala, Fakatamaki Fakaenatula, ‘Atakai, Feliuliuaki ‘o e ‘Eá mo e Fetu’utakí