15 ‘Epeleli 2016 ‘E fakahoko ‘a e ANZAC Day 2016 ‘i he ‘aho Monite 25 ‘o ‘Epeleli, ke fakamanatua si’i kau tangata mo fafine mei Tonga, ‘Aositelelia mo Nu’u Sila ne nau totau ‘i hono tau’i ‘oe melino ‘i he mamani.
Lolotonga e hoko ko ia ‘ae Kalipoli koe fuofua fatongia tefito ‘oe kau tau ‘Aositelelia mo Nu’u Sila ‘i he Tau Lahi ‘Uluaki ‘o Mamani, ‘oku faka’ilonga’i foki ‘i he ta’u ni ‘ae kakato e ta’u ‘e 100 ‘o ‘enau fua fatongia ‘i he Western Front (Falanise mo Pelisiume) ‘i he tau ‘oe Somme ‘i hono tokoni’i ‘e he ngaahi fonua ‘oe Pasifiki, ‘o kau ai ‘a Tonga. Ko e Western Front na’e tokoni lahi taha ai ‘ae konga kau ANZAC ‘i he Tau Lahi ‘Uluaki ‘a Mamani.
‘Oku hoko ‘ae ‘aho 25 ‘o ‘Epeleli, ki he kau Tonga, Nu’u Sila mo ‘Aositelelia ko ha ‘aho fakamanatu fakafonua, ‘i he’etau fakamanatua mo fakalangilangi’i si’i kau tangata mo fafine ne nau ngaue mo feilaulau ‘i he tau, ngaahi feta’aki moe ngaue fakamelino. Ko ha taimi ke fakamanatua kinatolu ne nau foki mai mo kinatolu ne ‘ikai ke nau toe si’i foki mai, pea mo fakakaukau kihe tokoni ‘o ‘enau ngaue kiate kinatolu ne nofo pe ‘i ‘api.
Ke fakamanatua ‘ae ‘aho ANZAC ‘i Tonga, ‘e fakahoko ‘ae Polokalama Fakamanatua Ma’akinatolu ne Totau ‘i he 6.00am ‘i he ‘aho Monite 25 ‘o ‘Epeleli ‘i he Makafakamanatu ‘o Kinautolu ne Totau ‘i he Tau ‘oku tu’u ‘i Pangai. ‘E fakahoko e Ouau ‘e Kapiteni Sila Siufanga, koe Komanita Fakavahelahi ‘oe Salvation Army.
‘Oku fakaafe’i atu ‘e he Komisiona Ma’olunga ‘o Nu’u Sila mo ‘Aositelelia e kakai ‘o e fonua ke kau mai kihe Polokalama Ma’anautolu ne Totau, ‘oe ta’u ni. ‘Oku kole atu kiate kinautolu kotoa ‘e kau mai, ke nau maau ‘i honau nofo’anga ‘i he taimi 5.45am.
‘Oku malava ke tui mai ‘ae ngaahi metali.
NGATA’ANGA
Ki ha toe fakamatala, fetu’utaki kihe: Email: NZHCTonga@mfat.govt.nz / Telefoni: +676 23122