31 Me 2017 Kuo tuku ki tu’a ha ‘ofisa mei he Kau Tau ‘a ‘Ene Afió hili ia ‘a hono faka’ilo ia ‘i he malumalu ‘o e Lao ki he Kau Tau ‘a ‘Ene ‘Afió 1992 ki he tā mo e ‘ulungaanga ta’etaau ‘o fakangalikovi’i ‘a e Kau Tau ‘a ‘Ene ‘Afió.
Na’e makatu’unga ‘eni mei ha ma’u ha lāunga ‘i he ‘aho 11 ‘o Mē mei ha mātu’a tauhi fānau ‘o e taha e kau ako ‘i he To’u Hū Fakatahataha hono 61 ‘a e Kau Tau ‘a ‘Ene ‘Afió ‘i Kemi Taliaí.
Ko e lāungá na’e tukuaki’i foki ‘a e ‘ōfisa na’e faiako ‘i he To’u Hú ki ha fakalavea ki he taha ‘o e kau akó. Ko e fakalavea ko ‘ení ko hono tutu’aki ha haiane ‘e ha sōtia ‘a e sino ‘o e tokotaha ‘i he kau akó.
Na’e fakahoko atu leva ‘a e ngāue ki ai ‘a e kau Polisi Fakakau Tau (Military Police) ‘o fakapapau’i ‘oku mo’oni ‘a e lāunga ko ‘ení pea na’e hoko atu ai pē ki hono fakahoko ha hopo ‘i he malumau ‘o e Lao ki he Kau Tau ‘a ‘Ene ‘Afio ‘i he Fakamaau’anga Fakakautaú ‘i he ‘Ulu’i ‘Apitanga ko Senē.
Na’e halaia ai ‘a e faka’iloá pea tautea ai pē ‘i he Lao ki he Kau Tau ‘a ‘Ene ‘Afió pea fakamo’oni’i ko hono kapusi fakaongoongokovi’i (Dishonourable Discharge) ‘a e sōtia ni.
NGATA’ANGA
Tuku atu mei he Potungāue Fakamatala ‘Ea, Ma’u’anga Ivi, Ma’u’anga Fakamatala, Fakatamaki Fakaenatula, ‘Atakai, Feliliuaki ‘o e ‘Ea mo e Fetu’utaki