17 Fepueli 2021 ‘Oku fakafuofua ke tū’uta ‘i Nuku’alofá ni ha vakapuná mei Fisi, Brisbane pea mo Nu’usila ‘i he ‘aho 3 ‘o Ma’asi mo e kau pāsese fakakatoa ‘e toko 250.
Fakatatau ki he Pule Lahi ‘o e Potungāue MEIDECC Paula Pouvalu Ma’u ‘e fakamavahe’i makehe ‘a e kau pāsese ko ‘eni ‘i Tanoa pea mo Makeke.
Ko e vaka koia mei Fisi, ‘oku ha’u ai ‘a e kau Tonga koia na’a nau ‘i ‘Initia, kau ngāue vaka ‘a e Friendly Island Shipping Agency (FISA) ko e kau ngāue fakafaifekau ‘a e Siasi ‘o Sisu Kalaisi ‘o e Kau Ma’oni’oni ‘i he Ngaahi ‘aho ki mui ni pea mo e kau ako. Ko e kau pāsese ko ‘eni kuo nau ‘osi ‘atā mei he kolonitini ‘i Fisi ko e talitali pe ki he vaka.
‘Oku ‘i ai foki mo e vaka mei ‘Aositelelia ‘e tū’uta ‘i Nuku’alofa ‘i Fepueli ‘aho 25 ‘a ia ‘e ‘ikai ke heka mai ha pāsese ai. Ko e vaka ko eni ko ‘ene ha’u pe ke ‘ave ‘a e ni’ihi toli fua’i’akau.
Ko e kolonitini ‘o e kau pāsese kuo ‘osi hiki ‘o ‘aho ‘e 21(uike ‘e 3) ‘a ia na’e kamata ia mei he vakapuná ko ‘eni na’e toki tū’uta mai ‘i he uike kuo ‘osi.
NGATA’ANGA
Tuku atu mei he Potungaue Fakamatala ‘Ea, Ma’u’anga Ivi, Ma’u’anga Fakamatala, Tokangaekina Ngaahi Fakatamaki, ‘Atakai, Feliuliuaki ‘o e ‘Ea mo e Fetu’utaki