06 ‘Okatopa 2020 ‘E tū’uta ‘i Nuku’alofá ni ‘a e vakapuna mei Christchurch ki hono ‘omai ‘o e kau toli fua’i’akau ‘i he Falaite ‘o e uike ni, ‘Okatopa ‘aho 9.
Ko hono fakahā eni ‘i he fakataha ‘a e Komiti Fakafonua ki he Ngaahi Me’a Fakatu’upake ‘i he ho’ata ‘o e ‘ahó ni ‘i he Fale Fakataha’anga Fa’onelua.
‘Oku fe’unga mo e kau pāsese fakakātoa ‘e toko 141 ‘e folau mai, ‘a ia ‘oku kau ki ai ‘a e hou’eiki fafine ‘e toko 26. ‘Oku fua kotoa pē ‘e he Kautaha Toli Fua’i’akau ‘a Nu’usila ‘a e ngaahi fakamole fakapa’anga (chartered flight) ki hono fakafolau mai ‘o e kau pāsese ko ‘eni.
‘E fakahoko ‘a hono fakamavahe’i makehe ‘a kinautolu ‘i he ‘aho ‘e 14 ‘i he Kemi Taliai pea mo Makeke.
Fakatatau ki he Pule Lahi ‘a e Potungāue ki he Ngaahi Ngāue Fakalotofonua, Fotu Fisi’iahi, ‘oku fakahoko ‘a e sivi COVID-19 ‘a e kau pāsese ko ‘eni ‘i he ‘ahó ni mo ‘apongipongi. Ko ‘ene kakato pē ‘a e ngaahi sivi ko ‘eni, ‘e fai ai pē ‘a hono tokanga’i makehe ‘a kinautolu ‘o a’u ki hono fakafolau mai kinautolu ki Nuku’alofá ni.
‘E tū’uta foki mo e vakapuna ‘i he Tokonaki ‘o e uiké ni, ‘Okatopa ‘aho 10 mei Fisi, ko hono ‘omai ‘o e ngaahi naunau fakafalemahaki ‘a e Potungāue Mo’ui.
Na’e fakahā ai ‘e he Pule Lahi ‘o e Potungāue Mo’ui Toketā Siale ‘Akau’ola, ‘e fakahoko pe ‘a e ngaahi founga ngāue (health order procedures) angamaheni ‘oku fa’a fakahoko ki he ngaahi vakapuna pehé ni ki hono fakahifo ‘o e uta ‘i he taimi ‘e tu’uta ai.
NGATA’ANGA
Tuku atu mei he Potungaue Fakamatala ‘Ea, Ma’u’anga Ivi, Ma’u’anga Fakamatala, Tokangaekina Ngaahi Fakatamaki, ‘Atakai, Feliuliuaki ‘o e ‘Ea mo e Fetu’utaki.