28 Novema, 2019 ENGLISH Na’e laka hake ‘i he toko 200 ‘a e kakai mei Pātangata pea mo Popua na’a nau kau atu ki he Polokalama Fakaangaanga ‘o e Fetukutuku Fakavavevave ki ha Tokateu ki ha Sunami (tsunami evacuation drill) ‘i he pongipongi ‘o e ‘aho ni, 28 Novema, 2019.
Ko e polokalama ni na’e fokotu’utu’u ia ‘e he ‘Ōfisi ki hono Tokangaekina ‘a e Ngaahi Fakatamaki Fakaenatulá pea na’e tokoni ki ai ‘a e Kōmiti Ngāue ki hono Fokotu’utu’u ‘a e Ngaahi Palani ki ha Sunami (Tsunami Task Force), Kolosi Kulá, Potungāue Polisí, Tāmate Afí mo e Me’a Fakafokifá, mo e Va’a Fetu’utaki ‘a e Potungāue MEIDECC.
Koe’uhí ko e tu’u lavea ngofua ‘a e ongo kolo ni ‘o ka hoko mai ha Sunami, na’e fakataumu’a ‘o e polokalama ni ke vakai’i ‘a e tu’unga mateuteu ‘a e kakai ‘o e ongo koló ka hoko mai ha Sunami pea mo toe fakalelei’i ‘a e vā fengāue’aki ‘a e koló pea mo e ngaahi kupu fekau’akí.
Na’e kamata ‘a e polokalama ni ‘i he hoko ‘a e hivá pongipongi ‘o ngāue’aki ‘a e fakatātā ko e mofuike ‘i he malohi ko e 9.0 ‘i he me’afua mofuiké pea na’e fakalea leva ‘a e me’a fakaongo le’o lahí ke faka’ilonga ‘e ha’u ‘a e peaú ‘i he miniti ‘e 10 ki he 15 hili ‘a e mofuiké.
Lolotonga hono kei fakalea ‘a e me’a fakaongo le’o lahí na’e kamata leva ‘a e lele mai ‘a e longa’i fānau pea mo e mātu’a tauhi fānaú ki he feitu’u ne faka’ilonga’i ke fakataha ki ai ‘a kinautolu ne nau kau atu ki he polokalama ni. Na’e tokoni foki pea mo e ngaahi me’alele ‘a e ‘Ōfisi ki hono Tokangaekina ‘a e Ngaahi Fakatamaki Fakaenatulá ki hono fetukutuku fakavavevave mai ‘a e ni’ihi ‘o e koló pea mo e longa’i fānaú.
Na’e lekooti foki ‘e he kau ngāue mei he ‘Ōfisi ki hono Tokangaekina ‘a e Ngaahi Fakatamaki Fakaenatulá ‘a e hingoa ‘o kinautolu na’a nau kau ki he polokalamá.
Ko e polokalama ni ‘oku ne fakamamafa’i ‘a e mahu’inga ‘o tokateu ‘a e ngaahi koló ki ha peau kula pea ke fakahoko ‘a e fetukutuku fakavavevave ki he ngaahi feitu’u kuo ‘osi faka’ilonga’i ‘e hao ‘o ka tō mai ha Sunami.
NGATA’ANGA
Tuku atu mei he: Potungāue Fakamatala ‘Ea, Ma’u’anga Ivi, Ma’u’anga Fakamatala, Tokangaekina Fakatamaki Fakaenatula, ‘Atakai, Feliuliuaki ‘o e ‘Ea mo e Fetu’utaki.