20 ‘o Novema, 2019 ENGLISH ‘Oku loto ‘a e ‘Ofisi ‘o e ‘Ateni Seniale ke fakaha ke mea’i ‘e he Hou’eiki mo ‘ilo ki ai ‘a e kakai ‘o e Fonua, ‘e fakahoko ‘a e Uike Lao 2019 mei he ‘aho 17 ki he ‘aho 22 Novema 2019.
Ko e ta’u hono 12 eni ‘a hono fakahoko ‘e he ‘Ofisi ‘o e ‘Ateni Seniale ‘a e Uike Lao.
Ko e kaveinga ki he Uike Lao 2019 ko e Fakafepaki’i ‘a e Faito’o Ta’efakalao ‘i he Fakalahi e ‘ilo.
Ko e taumu’a ‘o e Uike Lao e ta’uni ke fakaha ki he kakai ‘o e fonua ‘a e ngaahi lao felave’i mo e faito’o ta’efakalao, ngaahi nunu’a kovi ‘a hono ngaue’aki ‘o e faito’o ta’efakalao, kae pehe ki he fatongia ‘o e pule’anga mo e ngaahi kupu fekau’aki kehe ‘i hono fakafepaki’i ‘o e faito’o ta’efakalao ‘i Tonga ni.
Ko ia ai, ‘e kamata’aki ‘a e Uike Lao ‘a e ouau lotu fakamanatu ‘i he ‘aho Sapate 17 Novema 2019 ‘i he Falelotu Senituli ‘o e Siasi Uesiliana Tau’ataina ‘o Tonga ‘i Nuku’alofa.
‘E fakahoko mo e ngaahi polokalama televisone mo e polokalama letio ‘e fakamafola ‘i he ‘aho Monite, 18 Novema, Pulelulu, 20 Novema mo e Falaite 22 Novema ‘i he taimi 6:00 ki he 7:00 efiafi.
‘E ‘i ai mo ha ngaahi polokalama felafoaki ‘e fakahoko atu mei he Letio AM 1017 ‘a e Letio Tonga ‘i he taimi 5:00 ki he 6:00 efiafi ‘i he ‘aho Tusite, 19 Novema mo e Tu’apulelulu, 21 Novema.
‘Oku fakaafe’i ‘a e fānau ako kalasi 5 mo e 6 ke nau kau mai ki he fe’auhi tā fakatātā faka’ali’ali (Poster). ‘E tapuni ‘a e fe’auhi he ‘aho Tusite, 19 Novema, ‘i he taimi 4:30 efiafi.
‘E fakahoko mo e polokalama Fakafe’iloaki (Open Day). ‘Oku taumu’a ‘a e polokalama Fakafe’iloaki ke ‘oatu ha faingamalie ki he Hou’eiki mo e Kakai ‘o e Fonua kenau fakalahi enau ‘ilo fekau’aki mo e ngaahi kupu fekau’aki ‘oku nau fakahoko fatongia ‘i hono fakafepaki’i ‘o e faito’o ta’efakalao. ‘E fakahoko ‘a e polokalama Fakafe’iloaki ‘i he ‘aho Pulelulu 20 Novema 2019, mei he 10:00 pongipongi ki he 12:30 efiafi.
‘Oku fakaafe’i atu ‘e he ‘Ofisi ‘o e ‘Ateni Seniale ‘a Hou’eiki mo e Kakai ‘o e Fonua ke nau kau mai ‘i hono fakamanatu ‘a e pule mo e ngaue ‘a e lao ‘i Tonga ni, pea mo e ngaue’aki ‘a e lao ke malu’i ‘a e kakai ‘o Tonga mei he ngaahi nunu’a kovi ‘o e faito’o ta’efakalao.
NGATA’ANGA ‘O E FAKA’ATA FAKAMATALA
Ki ha toe fakamatala, kataki ‘o fetu’utaki kia:
Mrs Linda Simiki Folaumoetu’i
‘Ateni Seniale
Fika Telefoni: (676) 24055
‘Imeili: ag@crownlaw.gov.to
