07 Siulai 2016 ‘Oku ngaue fakataha ‘a e kau taumalu’i fonua ‘a Tonga, Nu’usila, ‘Amelika, Falanisē, Siaina mo e tokotaha mei Pilitānia ki ha tokoni ki he Vahefonua Ha’apai ko e taha ‘o e polokalama tokoni ‘a e Taumalu’i Fonua ‘a Nu’usila ki ha hoko ha fakatamaki ki he ngaahi fonua ‘o e Pasifikí ‘oku ‘iloa ko e Tropic Twilight 16.
‘I ha fakamatala me ia Komanitā Brisbane Lokotui mei he Kau Tau ‘a ‘Ene ‘Afió fekau’aki mo e polokalamá ni mei Ha’apaí na’á ne pehē na’e kau mai ‘a e kau Taumalu’i Fonua ko ení ‘i he polokalama tokoni ko ia ‘i he fakatamaki ‘a Saikolone Ian pea ko ‘enau foki mai eni ke nau toe kau ki he ngaahi langa fakalakalaka ‘o e motú.
“’Oku mau ngāue fakataha mo e kau taukei ko ení ke mau toe mateuteu ange ki ha hoko ha fakatamaki fakaenatula pea mo ha toe fakatamaki pē. Ko e foki mai eni ‘a kinautolú ni ke langa ha public toilet block mo ha tānaki’anga vai ‘i he Uafu Taufa’ahau ‘i Pangaí, pea mo ha ngaahi tānaki’anga vai ki Faleloa, Lotofoa pea mo e Potungāue Tāmate Afi ‘i Pangaí.”
Na’e pehē ‘e Cdr. Lokotui ‘oku kau foki ki he timí ni mo ha kau ngāue fakafalemahaki mo ha kau taukei ‘i he tufungá.
“’A ia ‘e fakahoko ‘e he kau ngāue fakafalemahakí ha ngaahi talatalaifale pea mo ha tokanga makehe ki he ngaahi fokoutua ‘oku ‘ikai ke pipihí ke lau’ilo ki ai ‘a e kakai ‘o e fonuá.”
‘I he fakamatala aipē ‘a Cdr. Lokotuí na’á ne pehē ai kapau ‘e malava ke vave mo ‘osi ‘enau ngāue ki he ngaahi me’á ni ‘i he taimi ko ia te nau fakahoko fatongia ai ‘i Ha’apaí pea te nau toe fakahoko mo ha ngaahi tokoni tatau ki ha ngaahi feitu’u kehe kimu’a pea nau foki mai ki Tongá ni ‘i he ‘aho 24 ‘o e māhiná ni aipē.
‘Oku tataki ‘a e Tropic Twilight 16 ‘e Lieutenant Colonel Josh Wineera mei he Taumalu’i Fonua ‘a Nu’usilá pea ‘oku fakafuofua ki he toko 70 kotoa ‘a e kau ngāue ki he polokalamá ni.
Ngata’anga
Tukuatu mei he: Potungaue Fakamatala ‘Ea, Ma’u’anga Ivi, Ma’u’anga Fakamatala, Tokangaekina e Fakatamaki Fakanatula, ‘Atakai, Feliuliuaki ‘a e ‘Ea mo e Fetu’utaki