02 ‘Aokosi 2019 Na’e faka’ali’ali ‘e he ‘Apiako Mā’olunga ‘o ‘Eua ‘a e taha ‘o e ngaahi ngāue lava me’a ‘a e fanau ako foomu 5 ‘a ia ko e ngaahi mohe’anga na’e ngaohi mei he papá ‘ata’atā pē.
Fakatatau ki he fakamatala ‘a e Faiako ‘i he Ako Mā’olunga ‘o ‘Eua Manu Samiu, ko e taha ‘eni ‘o e ngaahi poloseki lalahi ‘a e fānau ako foomu nimá ‘a ia na’e kamata ‘i he ta’u kuo ‘osí ‘o fakataumu’a ke malava ‘e he ki’i tamasi’i takitaha ‘o fo’u ‘a e mohenga ‘e ua.
Ko e mohenga ‘e ua ko ‘ení ‘e faka’ali’ali ‘a e taha mo e taumu’a ke fakatau atu ia, pea ‘e foki leva ‘a e tamasi’i ako na’a ne fakahoko ‘a e ngāué mo e taha ki honau ‘apí ‘o tauhi ko e suvenia.
Ko e ngaahi mohe’anga tāpolo (double bed) kotoa ‘e 20 na’e faka’ali’ali pea na’e fakatau atu ia lolotonga ‘a e polokalama faka’ali’ali ‘i he mahu’inga ko e Pa’anga ‘e 500. ‘E tātānaki leva ‘a e sēniti ko ‘eni ‘e ma’u mei hono fakatau atu ‘o e ngaahi mohengá ke fakava’e’aki ia ‘a ‘enau poloseki fo’ou ko hono langa ‘o ha fale.
‘I he fakamatala ‘a Manu na’e mahino ‘a e vekeveke ‘a e fānau akó ‘i hono fakahoko ‘a e poloseki ko ‘eni, “Kou tui ko e fiefia tatau pe tene hoko atu ‘aki, pea kou tui ‘i he kaha’ú ‘e ‘i ai ha kautama te nau nima mea’a ke hoko atu e ngāue fakasanisaní, pe ko e tufungá pe ko e ‘u mala’e kehe.”
‘Oku ‘i ai ‘a e faka’amu ‘e hoko ‘o ‘aonga ‘a e ngaahi taukei ko ‘eni kuo ako ‘e he fānaú ke femo’uekina ki ai honau taimí ki ha me’a ‘oku toe sai ange mo ma’u ai ha’anau mo’ui.
Na’e faka’ali’ali foki mo e ngaahi naunau kehe ‘o kau ki ai ‘a e hakalo, huokauvao, tēpile kai mo e puha vala, ko e ngāue lava me’a ia ‘a e foomu 3 mo e foomu 4.
NGATA’ANGA
Tuku atu mei he Potungaue Fakamatala ‘Ea, Ma’u’anga Ivi, Ma’u’anga Fakamatala, Tokangaekina Fakatamaki Fakaenatula, ‘Atakai, Feliuliuaki ‘o e ‘Ea mo e Fetu’utaki.