12 ‘o Siulai, 2019 ENGLISH Na’e kamata ‘i he mahina ko Sune ‘a e ngaahi ngāue ‘a e Potungāue Ngaahi Ngaue Lalahi fekau’aki mo hono faka’ai’ai e kakai e fonua ki he malu ‘o e fefononga’aki he hala, folau vakapuna pea pehē ki he folau vaka tahi. ‘Oku tokonia mo poupou’i ‘eni ‘e he Poloseki Tonga Climate Resilience Transport Project kae fakapa’anga ‘e he Pangikē ‘a Mamani.
Ko e kemipeini ko ‘eni e malu e fefononga’aki ko e hoko atu pē ia e ngaahi ngāue ne ‘osi kamata mai he 2016-2017 ‘i he va’a lalahi pē ‘e 2: ‘a ia ko e hala pule’anga pea mo tahi. Ko e palani fo’ou ki he kemipeini ko ‘eni ki he malu e fefononga’aki ‘e kau mai ki ai mo e folau vakapuna pea ke kamata lele atu ia toki ngata ki Sune 2020.
Ko e kemipeini ko ‘eni ko hono taumu’a ke haofaki e mo’ui, liliu e to’onga fakakaukau ‘a e kakai pea ke holoki hono maumau’i e lao he fefononga’aki he hala pule’anga, ‘i tahi pea moe folau vakapuna. Koe taumu’a ‘oku vahevahe iiki ia kihe ngaahi kaveinga ko ‘eni; ki he malu e fefononga’aki e hala Pule’anga- “ KOE MO’UI ‘OKU TAHA PE” ” (you only live once), ki he malu e folau vakatahi- “MATEUTEU KA KE HAO” (be ready be safe), ki he malu e fefonga’aki vakapuna- “FIKA ‘ULUAKI E HAO MOE MALU – KA KE HAO MA’U PE (safety first – safety always).
Ko e taha e ‘uluaki ngaue kuo lava he kemipeini ko eni ne fakahoko ia ‘i Sune 2019 ‘a ia ne lava ke tukuatu ai ha ngaahi fale’i (text message) ngaue’aki e telefoni to’oto’o e kautaha Digicel moe TCC, ngaahi fale’i fakafou he ‘ata vitio ‘a ia ne tukuatu ia he Televisone Tonga, pea pehē ki he ngaahi fale’i ne tukuatu ia he ngaahi letio FM. Ko e ngaahi fale’i kihe fononga he hala pule’anga ko hono fakamanatu pē ki he kakai e fonua ke faka’uli tokanga, tauhi e lao e fefononga’aki, pea ‘oua e faka’uli konaa. Koe ngaahi fale’i ki he kau folau vakatahi ke fakapapau’i ‘oku “‘ai ma’u pe e tokanga” he taimi ‘oku ‘i vaka ai e kau pasese pea ke matu’aki tokanga ki he “hao mo malu” pea kihe fanga ki’i vaka iiki ange, ke fakapapau’i oku maau e ngaahi naunau fakahaofi mo’ui ‘i vaka hangē ko e saketi fakahaofi mo’ui, lolo, vakai’i e fakamatala ’ea fakamuimui taha pea mo ha letio kimu’a pea toki ‘alu ki tahi.
Lolotonga ko ia e katonga Uike Heilala, ne lava ke tukuatu atu ai e ngaahi fale’i fou he ‘ata vitio lolotonga e po fe’auhi taleniti ‘o fakavahavaha‘aki e ngaahi fe’auhi pea ko e ta’ahine na’a ne fakafofonga’i e Potungaue Ngaahi Ngaue lalahi kihe fe’auhi na’a ne fakatata’i ai e fekau ki he hao moe malu he fefononga’aki he hala pule’anga, folau vakatahi pea pehē kihe folau vakapuna. Ne lava ‘o tukuatu mo ha ngaahi banner ne ‘i ai e ngaahi ‘ata mo e ngaahi fale’i ki he hao mo e malu pea ne fakapipiki atu ia he ngaahi me’alele ‘a e Potungāue ne kau atu ki he faka’ali’ali he ‘aho (float parade).
Ko e ngaahi ngaue ke hoko atu ki ai ‘e kau ki ai e tukuatu e ngaahi fale’i he telefoni to’oto’o ki he hao mo e malu e folau vakapuna, ke ngaahi fakataha mo e kau Pule Fakavahe mo e ‘Ofisa kolo, ngaahi ‘apiako pea mo e komiuniti kau ai mo e ngaahi ‘otu motu.
NGATA’ANGA
Tuku atu mei he: Potungaue Ngaahi Ngaue Lalahi