8 ‘o Siulai, 2019 Na’e foaki ‘e Ta’ahine Pilinisesí Angelika Lātūfuipeka Tuku’aho ‘a e pa’anga ‘e 100,000 tupu ke fakalahi ‘aki ‘a e vahe ‘a e kau toulekeleká ke pa’anga 100 ‘i he māhina ni ke faka’ilonga’i e kātoanga’i ‘a e ‘Aho Fakahifo ‘o ‘Ene ‘Afió Kingi Tupou VI ‘i ha polokalama he pongipongi ‘o e ‘aho ni ‘i he holo ‘o e Kolisi Kuini Sāloté.
‘Oku fakafuofua ko e toko 4,000 tupu ‘i Tonga ni ‘oku nau kau ‘i he Polokalama Vahe Penisoni ‘a e kau Toulekeleká ‘a ia ‘oku kamata ‘i he ta’u 70 ki ‘olunga. Na’e laka hake ‘i he toko 500 ‘a e kau toulekeleka na’a nau ‘i he holo ‘o e Kolisi Kuini Sāloté ke tali ‘a e me’a’ofa ne foaki ‘e he Ta’ahine Pilinisesí.
Na’e fakamālō’ia ‘e he Ta’ahine Pilinisesí ‘a e ngaahi siasi ka e pēhē foki kiate kinautolu ‘i San Francisco ‘Amelika, Sēnē ‘Aositēlēlia pea mo Tongatapu ni na’a nau na’a nau tokoni fakapa’anga ke fakalahi ‘aki ‘a e vahe ‘a e kau toulekeleká ‘i he māhina ni.
“Kuo hoko ‘o mo’oni e misi hono tātānaki tahataha mai ‘a e fanga ki’i maká ‘o lī ki he ipú ke fai e inu mei ai. Pea ko e ola eni ‘etau ngāué hono tō, tauhi, fafanga mo fu’ifu’i ‘a e vainé kuo fua ‘o māsani hono matalá he tafa’aki ‘e taha ‘o e ‘ā´ ‘o tofuhia ai hotau kaunga’apí.”
‘I he lea ‘a e Sea ‘o e Poate Sino’i Pa’anga Mālōlō Fakafonua ‘a e Pule’anga Tongá mo Hono Tokangaekina e Kau Toulekeleká Toketā Tu’ipulotu Kātoanga na’a ne fakahā ‘oku laka hake ‘i he $200,000 ‘a e fakakātoa e me’a’ofa kuo foaki ‘e he Pilinisesi Angelika Lātūfuipeka ma’ae kau toulekeleká talu mei he 2015.
NGATA’ANGA
Tuku atu mei he: Potungāue Fakamatala ‘Ea, Ma’u’anga Ivi, Ma’u’anga Fakamatala, Tokangaekina Fakatamaki Fakaenatula, ‘Atakai, Feliuliuaki ‘o e ‘Ea mo e Fetu’utaki.