14 ‘o Me, 2019 Na’e ‘a’ahi ‘a e Tokoni Palēmia ‘o Nu’usila, Rt Hon Winston Peters MP ki he ‘Eiki Palēmia, Hon. Samuela ‘Akilisi Pohiva, ‘i ‘Aokalani, Nu’usila ‘i he Falaite 10 ‘o Me, 2019.
Na’e poupou lelei ‘a e Tokoni Palēmia ‘o Nu’usila, ‘a ia na’a ne kole ‘a e faingamālie ko eni ke ‘a’ahi ki he ‘Eiki Palēmia ‘o Tonga, ki he ‘Eiki Palēmia mo fakaa’u ‘a e talomonu ke ola lelei ‘a e ngaue faka-faito’o ‘oku fakahoko ki ai ‘i he Mercy Hospital. Na’e ma’u ai mo e faingamalie ke na alea’i ‘a e hokohoko atu ‘o e ngaue fetokoni’aki he vā ‘o e Pule’anga Nu’usila mo e Pule’anga Tongá ki ha founga ke fakafepaki’i’aki ‘a e palopalema ki he faito’o konatapu, ‘oku fehangahangai mo e ongo fonua ni pehē ki he Falealea fo’ou ‘oku teuaki hono langa ‘o fakapa’anga ‘e he Pule’anga Nu’usila mo ‘Aositelēlia.
Kuo lava ‘a e konga ‘uluaki ‘o e ngaue faka-faito’o ki he ‘Eiki Palēmia ‘i he Mercy Hospital ‘i he ‘aho 8 ‘o Mē pea ‘e toe hoko atu ki he konga hono ua ‘i he ‘aho Tu’apulelulu, 16 ‘o Mē 2019.
NGATA’ANGA
Tuku atu mei he: ‘Ofisi ‘o e Palēmia, Pule’anga Tonga, Nuku’alofa, Tonga.Tu’asila:Taufa’ahau Road, P.O. Box 62.Tel: (676) 24 644 Fax: (676) 23 888; Ngaahin Faka’eke’eke- Email: pressoffice@pmo.gov.to Uepisaiti: www.pmo,gov.to