08 Me 2019 Na’e fakahoko ‘i he pongipongi ‘o e ‘aneafi ‘a e fakataha ‘a e Komiti Fale’i Ma’u Me’atokoni Mo’ui Leleí (Healthy Eating Advisory Committee) ‘a ia ko e kōmiti kuo fokotu’u ke nau tokangaekina ‘a e ma’u me’atokoni mo’ui leleí ke tau’i ‘o e mahaki ‘ikai ke pipihí, ‘i he Falemahaki Vaiolá.
Na’e fakataumu’a ‘a e fakataha ko ‘ení ke uki mai ‘a e kau mēmipa mei he ngaahi Potungāue ‘a e Pule’angá mo e ngaahi kupu fekau’aki ‘oku felāve’i ‘enau ngāué mo hono teke ‘o e ma’u me’atokoni mo’ui leleí.
Ko e kōmiti ko ení na’e fokotu’u ia ‘i he 2017. Ko e taha ‘eni ‘a e kōmiti ‘e 4 kuo fokotu’u ke nau tokangaekina ‘a e mahaki ‘ikai ke pipihí.
Na’e kau atu ki he fakatahá, ‘a e fakafofonga mei he Potungāue Ngoué, Potungāue Tānaki Pa’angá mo e Kasitomú, Potungaue Akó, Toketā Mataotao ‘i he Va’a ‘a e Fānau Iikí, Toketā ‘i he mahaki suká, fakafofonga mei he Kautaha ‘a e kau Fakaleití mo e kau fakafofonga kehe pē.
‘I he fakamatala ‘a e Tokotaha Fale’i ki hono fakahoko ‘a e Palani Fakafonua ki he Mahaki ‘ikai pipihí, Sarah Jones ‘oku ‘i ai ‘a e taumu’a ke fakataha fakakuata ‘a e ngaahi kōmiti ko ‘ení ‘o a’u ki Sune ‘o e ta’u fo’oú.
‘Oku taumu’a ‘eni ki hono teuteu’i ‘o ha Palani Fakafonua fo’ou (National NCDs Strategy) ki he mahaki ‘ikai ke pipihí, ke fetongi’aki ‘a e Palani Fakafonua ‘a ia ‘e ‘osi ia ‘i he Sune ‘o e ta’u fo’oú.
Na’a ne pēhē foki ko e ngaahi komiti ‘e fā ko ‘eni ko ‘enau ngāué ko hono faka’ilo, fale’i mo tānaki ha ngaahi fakamatala tonu ki he Komiti Fakafonua ‘i he mahaki ‘ikai ke pipihí ke tokoni ki hono teuteu’i ‘o e palani fakafonuá.
‘I he fakamatala ‘a e ‘Ōfisa Poloseki Ma’olunga ‘i he Tonga Health ka ko e Sekelitali ‘o e Komiti Fale’i Ma’u Me’atokoni Mo’uilelei, Sevaki Fe’ao ‘oku kau atu ki he kōmiti ‘e fā ko ‘ení ‘a e Komiti Fale’i ki he Fakamalohisinó, Komiti Fale’i ki he Tapaká, pea mo e Komiti Fale’i ki he Kava Mālohí.
‘Oku fakapa’anga ‘a e polokalama ni ‘e he Pule’anga ‘Aositeleliá mo e Pule’anga Tongá ‘o fakafou ‘i he Potungāue Mo’uí.
NGATA’ANGA
Tukuatu mei he Potungaue Fakamatala ‘Ea, Ma’u’anga Ivi, Ma’u’anga Fakamatala, Tokangaekina Fakatamaki Fakaenatula, ‘Atakai, Feliuliuaki ‘o e ‘Ea mo e Fetu’utaki.