28 ‘o Ma’asi, 2019 ENGLISH Ne tu’utu’uni he ‘aho ni ‘e he ‘Eiki Palemia, Hon. Samuela ‘Aklisi Pohiva, ke to mo loto ‘a e fuka kotoa pe ‘i he ‘Otu Tonga ‘i he ‘aho Falaite 29 Ma’asi 2019 ko e faka’apa’apa mo hono fakamanatu ‘akinautolu kainga Mosilemi na’a nau pekia ‘i hono ‘ohofi fakatautoitoi kinautolu ‘i Christchurch ‘i he ‘aho 14 Ma’asi 2019.
Ko ouau faka’apa’apa ko eni ‘e fakahoko taimi tatau ia pea mo e “Ouau Fakafonua ki hono Fakamanatu” ‘o e kau pekia ‘a ia ‘oku fakahoko ‘e he Pule’anga Nu’usila ‘i he Pa’ake Hagley ‘i Christchurch ‘i he taimi 10:00 pongipongi Falaite 29 Ma’asi.
Ne me’a ‘a e ‘Eiki Palemia ‘o pehe, “Ko e tu’utu’uni ke to mo loto ‘a e fuka kotoa ‘i he ‘Otu Tonga ‘i he ‘aho 29 Ma’asi na’e fakahoko ia ‘e he Kapineti ‘i he ‘enau fakataha ‘i he Falaite 22 ‘o Ma’asi. ‘I he ‘eku tohi fie kaunga mamahi ki he ‘Eiki Palemia ‘o Nu’usila, Rt. Hon. Jacinda Adern na’e ‘oatu he uike kuo ‘osi, na’a ku pehe, ‘Oku kaunga tangi ‘a e kakai pea mo e Pule’anga Tonga mo koe, ‘i ho’o fakatahataha’i atu ho famili mei he ngaahi matakali kehekehe ‘o e fonua, ke mou tengihia fakafonua mo telio ‘a e kau pekia, pea ke toe lalanga’i ‘a e ngaahi kupu fekau’aki ke toe ma’uma’uluta ‘a e fe’ofo’ofani mo toe masani ange ‘a e fonua ‘o hange ko ia ‘oku tau anga kotoa ki ai”.
Na’e toe me’a ‘a e ‘Eiki Palemia ‘o ne fakahoko mai ‘e fai ha polokalama fakamanatu mo e fusi fuka ke fakamanatua ‘a e kau pekia mo e kau lavelavea ‘i he ‘ohofi fakatautoitoi na’e fakahoko ‘i Christchurch ‘i he ‘ulu’iapitanga ‘o e Potungaue Polisi Tonga ‘i Longolongo ‘o kamata he 8.00 hengihengi he ‘aho Falaite 29 ‘o Ma’asi 2019.
NGATA’ANGA