27 Ma’asi 2019 ‘Oku fiefia ‘a e ‘Ofisi ‘o e ‘Ateni Seniale ke ne fakaha, ‘i he ‘aho Tu’apulelulu 21 Ma’asi 2019, na’e fakanofo ‘e he ‘Ene ‘Afio Kingi Tupou VI, hili ‘a e ma’u ‘a e fale’i mei he Penolo ki he Ngaahi Fakanofo mo e Tu’utu’uni Fakafakamaau mo e Fakataha Tokoni ‘o ‘Ene ‘Afio, ‘a Linda Simiki Folaumoetu’u SC, ko e ‘Ateni Seniale ‘o e Pule’anga ‘o Tonga.
Ko Linda Folaumoetu’i ‘oku ne ma’u ‘a hono mata’itohi Bachelor of Arts and Laws (BA LLB) mei he ‘Univesiti ‘o ‘Okalani (1994), Post Graduate Diploma in Legislative Drafting mei he ‘Univesiti ‘o e Pasifiki Saute (1997), pea mo e mata’itohi Master of Laws (LLM) mei he ‘Univesiti ‘o Melipoane (2000). Na’e tali ke fakahu ia ki he Fakamaau’anga Lahi ‘o Nu’usila ‘i he 1994 pea ki he Fakamaau’anga Lahi ‘o Tonga ‘i he ta’u tatau, pea toe tali ke fakahu ki he Fakamaau’anga Lahi ‘o e ‘Otu Motu Solomone ‘i he 2008.
Na’e fuofua fakahoko fatongia ‘a Linda Folaumoetu’i ‘i he 1993 ko e ‘Ofisa Lao (Legal Officer) ‘i he Potungaue Lao ‘o e Kalauni (Crown Law Department) ‘o e ‘aho ko ia, ‘a ia ‘oku ui ‘i he ‘aho ni ko e ‘Ofisi ‘o e ‘Ateni Seniale, kimu’a pea ma’u hono mata’itohi mo tali ki he ngaue fakalao. Na’e fakanofo ia ko e Fakahinohino Lao Seniale (Solicitor General) mo e ‘Ulu ‘o e Potungaue ‘o e Potungaue Lao ‘o e Kalauni mei Tisema 2006 ki Sune 2008. Na’a ne hoko atu ‘o ngaue ko e Fale’i Faka-lao ma’ae Ngaue Faka-lao mo Faka-Fakamaau’anga ‘i he ‘Otu Motu Solomone, ‘a ia na’e ‘i he malumalu ‘o e Ngaue Tokoni Faka-Feitu’u ki he ‘Otu Motu Solomone (RAMSI) mei Siulai 2008 ki Tisema 2014. Na’a ne foki mai leva ki Tonga ni pea na’e fakanofo ia ki hono fatongia lolotonga ko e ‘Ofisa Pule Ngaue ‘o e ‘Ofisi ‘o e ‘Omipatimeni ‘i he ‘aho 5 Ma’asi 2015.
Ko Linda Folaumoetu’i ko e memipa foki ia ‘o e Komisoni Fili talu mei he 2016, pea na’e fakanofo ‘e he ‘Ene ‘Afio ko e Tu’i ko e ‘Eiki Lao (Law Lord) mo e Memipa ‘o e Komiti Lao ‘o e Fakataha Tokoni ‘i he 2018.
‘E fetongi ‘e Linda Folaumoetu’i ‘a ‘Asipeli ‘Aminiasi Kefu SC, ko e ‘Ateni Seniale Le’ole’o, ‘i hano tukuange mai ‘a Linda Folaumoetu’i mei hono fatongia lolotonga ko e ‘Ofisa Pule Ngaue ‘o e ‘Ofisi ‘o e ‘Omipatimeni, pea mo hono aofangatuku ‘a e ngaahi tu’unga ‘o e ngaue.
‘E fakakakato leva pea fakangata ‘e he ‘Ateni Seniale Le’ole’o ‘a hono fakanofo ia ki he ‘Ofisi ‘o e ‘Ateni Seniale hili ia ‘a e ta’u ‘e 22 ‘o ‘ene fakahoko fatongia.
NGATA ‘A E ONGOONGO TUKU ATU
Ki ha toe fakamatala pe fakama’ala’ala, fetu’utaki kia:
Mr ‘Aminiasi Kefu
‘Ateni Seniale Le’ole’o
Ngaahi Fika Telefoni: (676) 25347 (Fetu’utaki Hangatonu), (676) 7815314
Fekisimile: (676) 24005
‘Imeili: dpp@crownlaw.gov.to, aakefu@gmail.com