25 ‘o Ma’asi, 2019 ENGLISH Fakatatau pea mo e Tu’utu’uni ‘a ‘Ene ‘Afio ‘i he Fakataha Tokoni ‘i he ‘aho Tu’apulelulu ko hono 21 ‘o Ma’asi 2019, ne fekau ‘a e ‘Eiki Tauhi Sila Faka-Tu’i ke tuku atu ‘a e Fakamatala ni ki he Kau Faiongoongo pe Mitia pea mo e Kakai ‘o e Fonua:
[1] Ne Tu’utu’uni ‘e he ‘Ene ‘Afio ‘i he Fakataha Tokoni ki he Tohi Tangi ‘e tolu (31) felave’i pea mo e Pule’anga ‘o pehee ni:
[a] KE tuku atu ‘a e Ngaahi Tohi Tangi ni ki he ‘Omipatimeni kene vakai mo ngaue fakavavevave ki ai, kene fakahoko ha ngaahi fakatotolo ‘oku ne pehee ‘oku fe’unga mo taau ke fakahoko pea mo fai ha’ane fakakaukau aofangatuku fekau’aki mo ha ngaue ‘e ‘ikai hoa mo e fakapule’i ngaue lelei tene ma’u mei he’ene fakatotolo koia: pea toki lipooti ki he ‘Ene ‘Afio;
[b] KE tu’utu’uni ki he Pule’anga ke nau ngaue fakavavevave ki hano fakapa’anga fe’unga ha Komisoni ki he Fakafepaki’i ‘o e Ta’efaitotonu ke kamata fakahoko fatongia ‘i he ‘aho 1 ‘o Siulai 2019 ‘o kau ai mo e vahenga ‘o ha Komisiona ke ‘i ha tu’unga vahenga fakafakamaau ke tali ‘e he ‘Ene ‘Afio; pea,
[c] KE tuku atu ‘a e Ngaahi Tohi Tangi ni ki he ‘Ateni Seniale, mo e Talekita ki he Ngaahi Talatalaaki Hia ‘a e Pule’anga, pea mo e Komisiona Polisi ke fakahoko ha fakatotolo ‘o taumu’a:
[i] ke fai ha faka’ilo ‘o kapau kuo maumau’i ‘a e Lao ki he Ngaahi Hia pea ‘oku ‘i ai mo ha tu’unga fakamo’oni fe’unga ke fai ha faka’ilo;
[ii] ke fai ha ‘eke pe hopo sivile ‘oku taau ke pouaki ‘a e ngeia mo e molumalu ‘o e Konisitutone mo e Lao ‘o Tonga;
pea mo fale’i ki he ‘Ene ‘Afio, mei he taimi ki he taimi, felave’i mo e tu’unga ‘oku ‘i ai ‘a e ngaue ni.
1 Ko e Tohi Tangi ‘e 3 ‘i he ‘aho 18, 20 mo e 21 ‘o Fepueli 2019 mei he Komiti Fakafonua ki hono Fakafepaki’i ‘o e Faihala, Hou’eiki Nopele ‘e Ni’ihi, Kau Fakafofonga Fale Alea mo e Hou’eiki Minisita Malōlō ‘o e Kalauni mo e Ngaahi Siasi Penitekosi ‘e Ni’ihi.
[2] Ne tali ‘e he ‘Ene ‘Afio ‘i he Fakataha Tokoni ha Fale’i Fakataimi mei he Komiti Fakafakamaau ‘a e Fakataha Tokoni2 pea mo ha Fale’i Fakalao mei he ‘Ateni Seniale Le’ole’o.
[3] Ko e fale’i ‘a e Komiti Fakatotolo mo Fakama’opo’opo ‘o e Ngaue Hohoko mo e Tala ‘o e Fonua3 ki he Komiti Fakafakamaau ‘a e Fakataha Tokoni ‘i he Ngaahi Tohi Tangi ni fekau’aki mo ha ngaahi fakamatala, fale’i pe fakahinohino kau ki he anga faka Tonga pe tukufakaholo faka Tonga ‘e toki fai ha tu’utu’uni kiai ‘a ‘Ene ‘Afio ‘i he Fakataha Tokoni ha maau mai e fale’i koia.
NGATA’ANGA ‘O E FAKAMATALA FAKA’ATĀ
‘Ofisi ‘o e ‘Eiki Tauhi Sila Faka-Tu’i
‘Ofisi ‘o e Palasi
Nuku’alofa
Tu’asila ‘Imeili : lpseal4@gmail.com
2 Ko e kau Memipa ‘o e Komiti Fakafakamaau ‘a e Fakataha Tokoni ko e kau ‘Eiki Lao ‘a ‘Ene ‘Afio ‘a ia ko Lord Dalgety Q.C. (ko e Sea), ko Lord Tupou K.C., ko Linda Simiki Folaumoetu’i, ko Michael Dishington Scott K.C., pea mo Tu’inukutavake Barron Afeaki. Ko e Kalake ki he Komiti ni ko Mele V Folau.
3 Ko e kau Memipa ‘o e Komiti Fakatotolo mo Fakama’opo’opo ‘o e Ngaue Hohoko mo e Tala ‘o e Fonua ko Faifekau Toketā ‘Ahio (ko e Sea), ko ‘Eiki Nopele Vaea, ko Dowager Lady Fusitu’a, ko Takapu, pea mo Faifekau Toketā Tevita Tonga Mohenoa Puloka. Ko e Sekelitali ki he Komiti ni ko ‘Eiki ‘Alematea
Vaha’i.