12 ‘o Ma’asi, 2019 ENGLISH Na’e talitali ‘e he Pule Ngāue ‘a e Potungāue MEIDECC Paula Ma’u mo e kau ngāue ‘a e ‘Ōfisi ki hono Tokangaekina e Ngaahi Fakatamaki Fakaenatulá (NEMO) ‘a e Tokoni Minisitā ‘a ‘Aositēlēlia ki he Fakalakalaka Fakavaha’a pule’angá ka ko e Senatoa ki he Pasifikí Hon Anne Ruston ‘i he ‘ōfisi ‘o e NEMO he pongipongi ‘o e ‘aho ni.
‘I he lea talitali ‘a Paula Ma’ú na’a ne fakahā ai ‘oku kei fakahoko pē ‘a e ngāue ki hono fakaakeake ‘o e fonuá hili ‘a Saikolone Gita.
“’Oku mau hounga’ia ‘aupito ‘i he ngaahi tokoni ‘a e Pule’anga ‘Aositeleliá pea mo e ngaahi kupu kehekehe pē hili ‘a e Saikolone Gita ‘a ia na’e fe’unga fakakātoa mo e pa’anga Tonga ‘e $136 miliona, ‘a ia ‘oku kau ki ai ‘a e tokoni fakapa’anga pea mo e koloa.”
Ko e ‘a’ahi mai ko ‘eni ‘a Hon Ruston ki Tonga ni ko e konga pe ia ‘a e ngāue ‘a e Pule’anga ‘Aositēlēliá ke toe fakamalohia ange honau vā fengāue’aki mo e ngaahi fonua ‘i he Pasifikí.
Na’e kau ‘i he ‘a’ahi mai ki he ‘Ōfisi ‘o e NEMO fakataha mo Hon Ruston ‘a e Talafekau Lahi fili ‘a ‘Aositēlēlia ki Tonga ni Adrian Morrison, Tokoni Talafekau Lahí Rhona McPhee pea mo e ni’ihi ‘o e kau ngaue mei he Potungāue ki Muli mo e Fefakatau’aki ‘a ‘Aositēlēliá ‘i Tonga ni.
NGATA’ANGA
Tuku atu mei he: Potungaue Fakamatala ‘Ea, Ma’u’anga Ivi, Ma’u’anga Fakamatala, ‘Ofisi ki hono Tokangaekina e Fakatamaki Fakaenatula, ‘Atakai, Feliuliuaki ‘Ea mo e Fetu’utaki.