12 ‘o Ma’asi, 2019 ENGLISH Na’e tali lelei ‘e he ‘Eiki Palemia, Hon. Samuela ‘Akilisi Pohiva, ha ngaahi misini palau ‘e fa mei he ‘Amipasitoa ‘a Siaina ki Tonga, HE Wang Baodong, ‘i ha ouau na’e fakahoko ‘i he ‘Ofisi Pule’anga St. George ‘i Nuku’alofa, he pongipongi Monite (11 Ma’asi).
Fakatatau ki he fakamatala na’e tuku mai meia Mr. Yu Hongmiao, ko e Sekelitali Fika Ua ‘i he ‘Ofisi ‘o e ‘Amipasitoa Siaina ‘i Nuku’alofa, ko e ngaahi palau ‘e fa ko’eni ko e uta ia hono ua mei he palau ‘e valu ‘a ia ko e konga ia ‘o e tokoni na’e ‘osi palomesi mai ‘a e kolo ko Guangdong ‘o Siaina tenau foaki.
Na’e fokotu’u ‘a e va fengaue’aki ‘a Tonga pea mo Dongguan ‘i he 2015, ‘o fou ‘i he tokoni’i ‘e he ‘Ofisi ‘o e ‘Amipasitoa Siaina ‘i Tonga. ‘I he ta’u ‘e fa kuo hili kuo tokoni mai ai ‘a e kolo ko Dongguan ki he langa fakalakalaka ‘i he ngaahi ‘elia kehekekehe kau atu ki ai ‘a hono fakalelei ‘o e ngaahi hala ‘e uangofulu ma taha ‘i loto ‘i he Kolisi ko Tupou pea mo e ‘uu hala ‘e taha tolu ma’a e takimamata ‘i Tongatapu.
Na’e foaki mai ‘e Dongguan ha ngaahi me’angaue mo e naunau tokoni afaa hili koia ‘a e Saikolone Fakatalopiki ko Gita ‘a ia ko e ngaahi me’angaue fakafalemahaki, pea mo e ngaahi tangike vai ne tufaki ki he ngaahi kolo ‘o Tongatapu pea mo ‘Eua.
Na’e fakahoko ‘e he Sekilitali Pule mo Sekelitali ki he Kapineti, Edgar Cocker, ha lea ‘o fakafofonga’i e ‘Eiki Palemia pea mo e Pule’anga Tonga ‘o pehe, “’Oku hounga ki Tonga ‘a e tokoni ‘oku fakahoko mai ma’upe ‘e Dongguan. Ko e palau ‘e fa ko’eni ‘e tokoni ki ha kau ngoue he ngaahi vahefonua ‘o Tongatapu mo Vava’u ‘a ia ne te’eki ke nau ta’imalie ha tokoni me’angaue peheni kimu’a atu. ‘Oku ou fakafofonga’i atu ai ‘a e fakamalo loto hounga mei he Pule’anga Tonga ki he pule’anga ‘o Dongguan pea pehe ki he Pule’anga ‘o Siaina ‘i he hokohoko ‘o ‘enau ngaahi tokoni ‘o lave monu ai ‘a e kakai ‘o Tonga.
Na’e fakamo’oni ‘a e ‘Eiki Palemia fakataha pea mo e ‘Ampasitoa Siaina ‘i ha ngaahi pepa ngaue ki hono foaki ‘o e ngaahi me’angaue ni kimu’a pea na me’a ki ha ngaahi palau fo’ou ni. Fakatatau ki he fakamatala ‘a e Sekelitali Pule mo Sekelitali ki he Kapineti ko e ngaahi palau ‘e fa ko ‘eni ‘e tufaki atu ia ki he ngaahi vahenga fili ‘o Tongatapu 1, Tongatapu 2, Tongatapu 10 pea mo Vava’u 16.
NGATA’ANGA
Tuku atu mei he: ‘Ofisi ‘o e ‘Eiki Palemia, Pule’anga Tonga, Nuku’alofa, Tonga. Tu’asila: Taufa’ahau Road, P.O. Box 62. Tel: (676) 23 600 Fax: (676) 23 888; Ngaahi Faka’eke’eke- Email: pressroom@pmo.gov.to Website: www.pmo.gov.to