12 Fepueli 2019 ‘Oku ‘i he tu’unga fakafiemālie pē ‘a e ngaahi ‘otu motú hili ‘a e ‘alotāmaki fakatalopiki 06F pea mo e Saikolone ko Neil ‘i he faka’osinga ‘o e uike kuo ‘osí fakatatau ki he lipooti fakamuimui taha mei he ‘Ōfisi ki hono Tokangaekina e Ngaahi Fakatamaki Fakaenatula (NEMO).
Vahefonua Vava’u
Na’e fakahā ‘e he Talēkita Le’ole’o ‘a e NEMO Mafua Maka na’e ‘i ai pē ‘a e ngaahi ‘ulu ‘akau na’e holo ka na’e ‘ikai ke fu’u lahi fēfē ‘a e maumaú ‘i he Vahefonua Vava’ú.
“Ko e ‘ulu ‘akaú na’e lahi ‘ene holó. Ko e feitu’u pē na’e holo ai ‘a e fanga ki’i ‘ulu ‘akau iikí na’e fai pē hono ue’i ki he tafa’akí, ka ko hono mo’oni na’e ‘ikai ke fu’u lahi ‘a e maumaú.”
Na’e līpooti mai ‘ane hengihengi mei he vahefonuá fakafuofua ki he taimi 3:30 ‘oku lolotonga ‘uha lahi ‘a Vava’u pea ‘i he taimi 9:30 he pongipongi ‘aneafí na’e likuesi ai ‘e he kau polisi ‘a Vava’ú ki he Senitā Faifatongia Lolotonga e Ngaahi Fakatamakí (EOC) ha ngaahi mīsini tutu’u ‘akau ke tutu’u’aki ‘a e ngaahi ‘akau ne holo he hala pule’angá tautefito ki he Hala Maivá.
“Ko ‘enau ō pē ‘o faka’ata’ata ‘a e ngaahi feitu’u na’e ‘i ai ‘a e ngaahi fu’u ‘akau na’e holo ki hala ‘aneafí. Na’e mahino mai mei he Vāhenga Pangaimotú he pongipongi ni ‘oku lelei pe ‘a e me’a kotoa, ‘ikai ha maumau lahi tukukehe ange ‘a e fanga ki’i maumau ki he ‘ulu fusi, siaine, hopa mo e ‘akau fua pē.”
Ongo Niuá
Na’e fakahā foki ‘e Maka ne ‘ikai ‘i ai ha maumau ne hoko ‘i he Ongo Niuá hili ‘a e ‘alotāmaki fakatalopiki 07F kā na’e līpooti mai ne ‘i ai ‘a e maumau ne hoko hili ‘a 06F fakatou’osi pē ‘a e Ongo Niuá. Na’e lahi ‘a e maumaú ko e holo ‘a e ‘ulu siaine mo e hopa pēhē ki he ngaahi ‘akau fua kehekehe pē.
Vahefonua Ha’apaí
‘I he līpooti mei he Vahefonua Ha’apaí na’e fakahoko ‘a e tokoni ki he nofo’anga ‘a e kāinga Lofangá ‘i Hihifo ‘a ia na’e tāfea kā kuo ‘osi maha ‘a e vai ko iá ‘i he taimi ni. Ne ‘i ai foki pea mo e ngaahi fāmili na’a nau kumi hūfanga ki he ngaahi holo ‘o e Siasi ‘o Sīsū Kalaisi ‘o e Kau Ma’oni’oni ‘i he Ngaahi ‘Aho ki Mui ni (LDS) ka kuo nau ‘osi foki ki honau takitaha ‘api.
Na’e ‘i ai foki ‘a e ‘api ‘e taha ne tāfea ‘i Nomuka pea ne kumi hūfanga ai ‘a e fāmilí ki he taha honau kaungā’apí.
Tongatapu & ‘Eua
‘I he taimi tatau na’e ‘i he tu’unga fakafiemālie pē ‘a e Vahefonua ‘Euá pehē foki ki Tongatapu. Ko e Vahe Hahaké pē na’e motuhia ‘enau ma’u’anga ‘uhilá ‘i he efiafi Falaite uike kuo ‘osí pea na’e fakahoko ai pē ‘a hono fakalelei’i ‘e he Kautaha ‘Uhilá ‘o mo’ui ‘i he ‘aho Tokonakí.
NGATA’ANGA
Tuku atu mei he: Potungāue Fakamatala ‘Ea, Ma’u’anga Ivi, Ma’u’anga Fakamatala, ‘Ōfisi ki hono Tokangaekina ‘a e Ngaahi Fakatamaki Fakaenatula, ‘Ātakai, Feliuliuaki e ‘Ea mo e Fetu’utaki.