28 ‘o Sanuali, 2019 ENGLISH Kuo tu’uta ‘i he efiafi ‘o e ‘ahó ni ‘i Nuku’alofa ‘a e vaka tene fakahoko ‘a e monomono ki he maumau ‘i he fetu’utaki ‘initanetí.Ne fengāue’aki ai ‘a e Va’a Fetu’utakí ‘oku fakamalumalu ‘i he Potungaue MEIDECC pea mo e Potungaue ki Mulí ke faka’atā ‘a e vaká ke tu’uta ‘i Tonga ni.
Na’e talitali ‘e he kau ‘ofisa ma’olunga mei he pule’angá ‘a e timi ‘oku nau folau mai ‘i he vaká ‘a ia tenau fakahoko ‘a e ngaue ke ngaahi ‘a e maumau kuo hoko ki he fetu’utaki ‘initanetí pea pehe foki ki he ngaahi kautaha fetu’utakí.
Ko e Va’a Fetu’utakí foki ‘a ia ‘oku fakafatongia ‘aki ‘a hono tokanga’i ‘a e sekitoa fetu’utaki ‘a Tongá pea mo fa’u ‘a e ngaahi tu’utu’uni pea mo e lao ki he sekitoa ni.
‘E toki mahino ai pē pe ko e hā e lahi ‘o e maumau, pea mo e loloa ‘o e taimi ‘e fiema’u ke solova ai ‘a e palopalemá.
Fakatatau ki he fakamatala kuo ma’u ‘e he Potungāue MEIDECC ‘oku alu ke fakalakalakaange mo vave ange ‘a e fetu’utaki ‘initanetí ‘o fakafou he satelaite ‘a ia ‘oku mahino ‘oku toe lahi ange ‘a e faingamalie ‘i he halanga satelaite kuo ma’u mai ke fakahoko ai ‘a e fetu’utakí.
Kuo lava foki ‘o fakahoko mo e fetu’utaki ‘i he laine telefoni fakalotofonuá, ki he ngaahi ‘otu motu pea mo tu’apule’anga ‘o tatau pē ‘i he ongo kautaha.
‘I he efiafi ‘o e ‘aho ni ne fakahoko ‘a e fakataha ‘a e Komiti Tu’uma’u ki he Ngaahi Ngāue ki Muli, Malu’i mo e Fefakatau’aki ‘a e Fale Alea ‘o Tonga mo e ngaahi hoa ngāue ki he fetu’utakí felāve’i mo e tu’unga kuo a’u ki ai ‘a e ngāue ki hono fakahoko ‘o e ‘initanetí.
NGATA’ANGA
Tuku atu mei he: Potungāue Fakamatala ‘Ea, Ma’u’anga Ivi, Ma’u’anga Fakamatala, ‘Ōfisi ki hono Tokangaekina ‘a e Ngaahi Fakatamaki Fakaenatula, ‘Ātakai, Feliuliuaki e ‘Ea mo e Fetu’utaki.
