25 Sanuali, 2019 ‘Oku ‘amanaki ke tu’uta ‘i he potu tahi ‘o Tonga ni ‘a e vaka tene fakahoko ‘a e monomono ki he maumau ‘i he fetu’utaki ‘initaneti (fibre cable) hili hono fakapapau’i ‘a e feitu’u ‘oku hoko ai ‘a e palopalemá.
‘E toki mahino he tau mai ‘a e vaka pe ko e hā e lahi ‘o e maumau, pea mo e loloa ‘o e taimi ‘e fiema’u ke solova ai ‘a e palopalema.
‘I he taimi tatau ‘oku kei hokohoko atu ai pē ‘a e ngāue ‘a e ngaahi Kautaha Fetu’utakí (TCC, Digicel, EziNet, Tonga Cable Limited (TCL)) pea mo e Potungāue MEIDECC ke fakahoko ‘a e ‘initanetí ‘o fakafou ‘i he satelaité ki he ngaahi ngāue’angá mo e ngaahi sēvesi mahu’inga ‘oku ngāue’aki ‘e he kakai ‘o e fonuá.
Fakatatau ki he fakamatala kuo ma’u ‘e he Potungāue MEIDECC kuo lava ‘o fakahoko ‘a e fetu’utaki faka‘initanetí ki he mala’e vakapuná, ngaahi kautaha vakapuná, pea mo e ngaahi kautaha talafi pa’anga. ‘Ikai ko ia pē ka kuo ‘osi lele lelei foki ‘a e sēvesi fakapangikē´ mo e ngaahi mīsini toho pa’angá (ATM).
‘Oku fakahoko foki ‘a e ngāue ke fakalahi ‘a e halanga satelaité ke fakafaingamālie’i ‘a e fetu’utaki ‘initanetí. Ka e tupu mei he si’isi’i ‘a e halanga satelaite ki tua’pule’angá ‘oku filifili ‘e he ngaahi kautaha fetu’utakí ‘a e ngaahi sēvesi ‘oku mahu’inga pea ‘e uesia ai ‘a hono ngāue’aki e ngaahi mitia fakasōsialé.
Na’e kamata ‘i he ‘aho Pulelulu ‘o e uike ni ‘a e ngāue ki hono fokotu’u ‘a e tisi satelaite ‘e nima mei he Kautaha Fetu’utaki Fakamamani Lahí (ITU) ne ‘omai ki Tonga ni ‘i he‘enau polokalama fakalakalaka (project) ‘oku fakamalumalu ‘i he MEIDECC, ‘a ia ‘oku fakataumu’a ke tokonia ‘a e tafa’aki fetu’utakí ‘i he ngaahi fakatamaki fakaenatulá.
‘Oku ‘oatu foki ‘a e kole ‘a e ngaahi kupu fekau’akí ki he kakai ‘o e fonuá ke ngāue fakapotopoto’aki ‘a e ‘initanetí kae faka’ata’atā ki hono ngāue’aki ‘e he ngaahi sēvesi ‘oku mahu’inga ange.
NGATA’ANGA
Tuku atu mei he: Potungāue Fakamatala ‘Ea, Ma’u’anga Ivi, Ma’u’anga Fakamatala, ‘Ōfisi ki hono Tokangaekina ‘a e Ngaahi Fakatamaki Fakaenatula, ‘Ātakai, Feliuliuaki e ‘Ea mo e Fetu’utaki.