02 Novema 2018 ‘Oku faka’amu ‘a e Potungaue Tanaki Pa’anga Hu Mai mo e Tute ke fakama’ala’ala atu ‘a e ongoongo ‘o fe’ave’aki ‘i he Facebook ‘a ia na’e fakatokanga’i ‘eni ‘e he Potungaue he mahina ko ‘Okatopa ‘o pehe ‘oku ‘i ai ‘a e tukuhau ‘oku hilifaki ‘i he uta ‘o e tokotaha folau ‘i he’ene tu’uta ‘i he Fua’amotu International Airport. ‘Oku loto ‘a e Potungaue ke fakaha atu ko e ongoongo ko eni ‘oku ‘IKAI MO’ONI. ‘Oku kei fakahoko pe ‘a e ngaue angamaheni ia ‘o e Potungaue ‘o makatu’unga ‘i he ngaahi koloa ‘oku ‘omai.
‘Oku ongo’i lahi ‘e he Potungaue ‘a e tukuaki’i hala kuo fai ‘i he ngaahi mitia fakasosiale ‘o ‘ikai ‘oatu hano fakama’ala’ala ki he tafa’aki ko eni.
‘Oku kei hokohoko atu pe ‘a e fakamanatu ki he kakai ‘o e fonua ke ‘omai hangatonu ho’omou ngaahi faka’eke’eke ki ha ngaahi me’a fakatukuhau ki he Potungaue.
Ki ha’o to e faka’eke’eke ki he Kaveinga ni pea fetu’utaki mai ki he Potungaue ki he email cst@revenue.gov.to pe ko e fika telefoni 26-432 pe 7400550.
Faka’apa’apa atu
Potungaue Tanaki Pa’anga Hu Mai mo e Tute