05 ‘Okatopa 2018 Na’e fakamo’oni ‘i he efiafi ‘aneafi ha aleapau ‘i he vaha’a ‘o e Polōseki ki he matu’uaki ‘a e ngaahi pole ‘a e feliliuaki ‘o e ‘eá (CRSP), ‘a ia ‘oku fakamalumalu ‘i he Potungāue MEIDECC, mo e fakafofonga mei he Kulupu Melino ‘o Kolomotu’a, pea mo e Kautaha ‘a e Nishi, ki hono fakalelei’i ‘o e fo’i hala ke ngāue’aki he taimi fakatamaki (evacuation route) ‘a ia ‘oku ‘alu mei Havelu ‘o a’u ki Mataki’eua.
Ko e aleapau fakamuimui taha ‘eni kuo fakamo’oni ‘i he ngaahi kolo ‘e 33, na’a nau ma’u faingamālie ki he Pa’anga Talasiti ki he Feliuliuaki ‘o e ‘Ea.
Na’e fakafofonga mai mei he Potungāue MEIDECC ‘a e Pule Lahi ‘a e Potungāue Paula Ma’u, mo e Talēkita ‘o e Feliuliuaki ‘o e ‘Ea, Lu’isa Tu’i’āfita Malolo, pea fakafofonga mai Kumazo Nishi mei he Kautaha ‘a e Nishi pea mo Finau Moa mei he Kulupu Melino ‘a Kolomotu’á.
Fakatatau ki he fakamatala ‘a e ‘Ofisa Ma’olunga ‘oku ne tokangaekina ‘a e Pa’anga Talasiti, Feleti Fa’otusia, ko e fo’i hala ko ‘eni ‘oku ‘amanaki ke fai kiai ‘a e ngāué ko e fo’i hala motu’a pē. ‘A ia ‘oku lele ia mei mui mei he ‘api mataka ‘i Havelu ‘o ‘asi ki Mataki’eua.
“Ko e fakataumu’a pē ke ngāue’aki ‘e he kakai ‘o e vahenga Kolomotu’a ki he hola fakavavevave ‘o ka hoko mai ha fakatamaki.”
‘Oku fe’unga mo e $18,000 ‘a e fakamole ki hono fakalelei’i ‘o e fo’i hala ko ‘ení. ‘Oku fakafuofua ‘a e lōloa ‘o e fo’i halá ki he kilomita ‘e 1.
Tuku atu mei he Potungāue Fakamatala ‘Ea, Mau’anga Ivi, Ma’u’anga Fakamatala, Tokangaekina Fakatamaki Fakaenatula, ‘Atakai, Feliuliuaki ‘o e ‘Ea mo e Fetu’utaki