08 ‘Aokosi, 2018 Na’e fakataha ‘a e ‘Eiki Palemia Samuela ‘Akilisi Pohiva ‘i he ‘Ofisi ‘o e ‘Eiki Palemia pea mo e Tokoni Minisita ki Muli ‘a e Pule’anga Siapani, Hon. Mr. Iwao Horii, ‘i he ‘aho Tokonaki ko hono 4 ‘Aokosi 2018.
Ko e taumu’a tefito ‘o e fakataha ko hono fakaloloto ke toe vaofiange ‘a e vaa fengaue’aki ‘a Tonga mo Siapaní pea ko e ‘asenita ne kau atu ki ai ‘a hono muimui’i ‘a e fakataha ‘a e kau taki ‘o e Pasifiki (PALM 8) ‘a ia na’e fakahoko ‘i Me. Na’e kau atu foki ki he fakataha ni ‘a hono talanga’i ‘a e ngaahi polokalama langa fakalakalaka kuo ‘osi loto ‘a Siapani ke fakapa’anga ‘o kau ai e ma’u’anga ivi mei he havilí ‘oku fo’u ke tanaki atu ki he mekauati 1.3 ki he ma’u’anga ivi ‘a Tonga. Na’e toe kau ki heni e poloseki ki hono faka’ai’ai e mateuteu ke fehangahangai mo e ngaahi fakatamaki fakaenatula ‘oku ui ko e, “Fakatokanga Tokamu’a Fakalotofonua” (NEWS) ‘a ia ko hono fakamole ‘oku fe’unga mo e pa’anga Tonga ‘e $56 miliona ‘o kau atu ki ai ‘a hono langa fo’ou ‘o e ‘ulu’i ‘ofisi ‘a e Komisoni Fakamafolalea ‘a Tonga.
‘I he’ene me’á talitali na’e fakamālō’ia ai ‘e he ‘Eiki Palemia ‘a e Pule’anga Siapani ‘i he ngāue kuo lava ki hono langa ‘o e uafu fakalotofonuá ‘a ia ne toki ‘osi huufi. Na’a ne pehe, “’Oku monu’ia ‘a Tonga ‘i he kakato ‘a hono langa ‘o e Uafu Tauafa’ahau Tupou IV ‘a ia ‘oku tu’u fakaholomamata ‘i he ‘elia halatahi. ‘Oku mau polepole ai! Pea ‘oku ‘amanaki ke tokoni e uafu ki he fakafaingofua e fefolau’aki ‘a e kakai pea mo e fefakatau’aki fakalotofonua pea mo tu’apule’anga”.
Na’e fakamālō’ia ‘e he ‘Eiki Tokoni Minisita Mr. Iwao Horii ‘a e ‘Eiki Palemia ‘i he faingamalie kuo na fakataha ai ‘i he pongipongi Tokonaki koe’uhi ne ‘ikai ha taimi fe’unga te ne ma’u ‘i he fonua ni. Na’a ne toe fakahā ‘ene loto hounga’ia ‘i he kau atu ‘a e Tokoni Palemia Semisi Sika ki he fakataha PALM 8 kau atu ki ai mo e ngaahi poupou ‘a Tonga ki Siapani he ngaahi fakataha’anga fakavaha’apule’anga. Na’a ne toe me’a foki ‘o pehe, “’Oku hounga’ia ‘a Siapani‘i he’ene vā fengāue’aki mo Tongá pea ‘e hokohoko atu ‘a e ngāue vāofi ‘a e ongo Fale ‘o e Tu’i pea mo e ngaahi fe’a’ahi’aki fakapule’anga ‘o kau ki ai e fe’a’ahi’aki hotau kakai. ‘Oku mau fakatu‘amelie foki ki hano fakamanatua ‘a e ta’u nima ngofulu ‘o hono fakhoko hotau ‘etau vaa fakatipilometika ‘i he 2020”. Na’e foaki atu foki ‘e he ‘Eiki Tokoni Minisita ki muli ‘o Siapani ha tohi mei ‘Eiki Palemia ‘o Siapani, Hon. Mr. Shinzo Abe na’e fakataumu’a hangatonu pe ki he ‘Eiki Palemia, Samuela ‘Akilisi Pohiva.
Ne ma’u foki moha faingamalie ‘o e ‘Eiki Palemia ke ne ‘ohake ‘a e kole tokoni ‘a Tonga na’e ‘osi fakafou ‘i he ‘ofisi ‘o e ‘Amipasitoa Siapani ‘i Nuku’alofa ní ki hono fakalōloa ‘o e hala tō’anga vakapuna ‘i he mala’evakapuna Fu’aamotu ko e mita ‘e 400 ‘a hono fakalōloa ‘a ia ‘oku fakafuofua hono fakamole mo e pa’anga ‘e $40 miliona. Na’e fakahoko mai ‘a e tali ‘a e ‘Eiki Tokoni Minisita Mr. Iwao Horii ‘oku nau fakaongoongo mai e Pule’anga Siapani ha ngaahi fakamatala fakaiiki fekau’aki mo hono teu fakalōloa ‘o e halanga to’anga vakapuna kau atu ki ai mo hono fakalelei’í ‘o e fale teminolo ‘o e mala’e vakapuna lolotongá.
Na’e ‘i he fakataha foki ‘a e ‘Amipasitoa Siapani ki Tonga, HE. Mr. Tetsuya Ishii, kau muimui folau faka‘ofisiale ki he ‘Eiki Minisita Mr. Iwao Horri ‘e toko tolu pea mo e kaungāngāue mei he ‘Ampasitoa Siapani. Na’e tu’uta ‘a e kau folau ní ki Tonga ni ‘i he po’uli ‘o e Falaite kuo’osí pea ‘oku ‘amanaki ke nau mavahe atu ‘i he efiafi Tokonaki. Ko ‘enau polokalama ‘a’ahi ‘i Tongá na’e kau atu ki ai ‘a e fakataha pea mo e Tokoni Palemia, Hon. Semisi Sika, pehe foki ki he takimamata ‘i he Uafu Taufa’ahau Tupou IV pea mo e ‘a’ahi ki he tokoni ‘a Siapani ki he ma’u’anga ivi mei he la’a ‘i Vaini.
NGATA’ANGA
Tuku atu mei he: ‘Ofisi ‘o e ‘Eiki Palemia, Pule’anga Tonga, Nuku’alofa, Tonga. Tu’asila:Taufa’ahau Road, P.O. Box 62. Tel: (676) 23 600 Fax: (676) 23 888; Ngaahi Faka’eke’eke- Email: pressoffice@pmo.gov.to