17 ‘Okatopa 2017 Na’e fakaava ‘e he Minisitā ki he Potungāue Tanaki Pa’anga Hū mai mo e Tuté Hon. Dr. Pohiva Tu’i’onetoa ‘a e fuofua Uike Tukuhau ‘a Tonga 2017 ‘aki ‘a e kaveinga “Pa’anga mei he kakaí ma’ae kakaí” ‘i he pongipongi ‘aneafi ‘i Nuku’alofa.
‘I he me’a fakaava ‘a e ‘Eiki Minisitā na’a ne pehē ‘oku fakataumu’a ‘a e Uike Tukuhau 2017 ke fakamālohia mo fakamamafa’i ‘a e fatongia ‘oku fakahoko ‘e he potungāué pea ke toe fakamahino ki he kakai ‘o e fonuá ‘a honau fatongiá mo hono mahu’inga ko ia ‘a e tānaki tukuhaú.
Na’á ne fakahā foki ko e fo’i fakakaukau ‘eni na’e talu pē hono fofoa’i mei mu’a, pea mo e feinga ke ‘ilo ‘e he tangata’i fonua mo e fefine’i fonua ‘a hona fatongia ki he totongi ‘o e tukuhaú.
“Ko e taimi lahi ‘oku mau nofo pē ‘o tali ke tautea’i ‘a e kakaí ‘o fakatatau ki he laó ka kuo pau kemau hū ki tu’a ‘o takai ki he ngaahi pisinisí mo e kakai ‘oku nau totongi e tukuhau ki he fonuá, talanoa mo kinautolu, mo fa’u ha ngaahi founga faingofua ke fakakakato’aki ‘a e ngaahi fatongia tukuhaú.”
Na’e pehē foki ‘e he ‘Eiki Minisitā ‘oku ‘i ai ‘a e ngaahi lelei ‘oku ma’u ‘e Tonga mei he tanaki ‘o e tukuhaú ‘o kau ai ‘a e kei monū’ia pē ‘a Tonga ‘oku kei ta’etotongi pē ‘a e falemahaki, pea ‘oku kei ako ta’e totongi mo ‘etau fānaú ‘i he ngaahi Lautohi ‘a e Pule’angá.
Na’a ne me’a foki ko e kamata eni ‘a hono fakamamafa’i ‘a e uike tukuhau pea ‘e fakahoko ‘a e polokalama ni fakata’u ‘a e potungāué.
‘I he lea talitali na’e fakahoko ‘e he Pule Lahi Le’ole’o ‘a e potungāue, Magdalena Fifita na’á ne fakahā ko e ngāue mo e fua fatongia ‘oku nau fakahokó ‘oku fakafolofola pē ia ‘o talu mei mu’a.
“Ko e ngāue ko ‘eni ‘oku mau faí ‘oku fakafolofola pē ia, ke ‘ave ‘a e me’a ‘a Sisa kia Sisa, ko e ngāué ia ke fakahoko, ko e me’a pē ‘oku mau ‘amanaki ki he kakai ke nau mea’i ko e ngāue mo e tānaki ko ‘eni ‘oku fakahokó ‘e toe foaki kātoa pē ia ma’a kimoutolu, ko e ngaahi lelei mo e fakalakalaka ‘o e fonuá ko e pa’anga ia ‘oku mau feinga’i ke tānaki he ‘aho kotoa.”
Taimi tatau na’e fakahā ‘e he Tokoni Pule Lahi ‘o e Potungāué Kelemete Vahe, ‘oku ‘i ai pē ‘a e ngaahi fakaanga mo e ta’efemahino’aki mo e kakai ‘o e fonuá ‘i he fua fatongia ‘oku nau fakahokó.
“Ko e fakaanga ia na’e mei fuoloa pē ia, ko e taimi ‘oku fakama’ala’ala atu ai ki he kakai ‘oku totonu ke nau totongi mai ‘enau tukuhaú ‘oku nau talamai ‘e kinautolu he ‘ikai ke nau totongi ‘e kinautolu, ko ia ‘oku fa’u ‘a e polokalama ko ‘ení ke tau lava ‘o fetakinima mo e tangata totongi tukuhaú katau lava ‘o mafuesia hotau fatongiá.”
‘Oku ‘i ai foki mo e ngaahi polokalama kehe ‘e fakahoko ia ‘i he toenga ‘o e uiké ni ‘o kau atu ki ai ‘a e ngaahi polokalama felāfoaki ‘i he Letiō 87.5, ko e fe’auhi talanoa fakatātā mo e fe’auhi lau maau ‘e fakahoko ia ‘i he ‘aho Pulelulú ki he ‘aho Falaité, pea mo e float ‘e fakahoko ia ‘i he ‘aho Tokonakí pea faka’osi’aki ‘a e lotu taha ki he Falelotu Senitulí ‘i he ‘aho Sāpate.
NGATA’ANGA
Tukuatu mei he Potungāue Fakamatala ‘Ea, Ma’u’anga Ivi, Ma’u’anga Fakamatalá, Tokangaekina ngaahi Fakatamaki Fakaenatula, ‘Atakai, Feliuliuaki ‘o e ‘Ea mo e Fetu’utaki